भ्रष्टाचार प्रकरणमा पूर्व सचिव ठाकुरसहित ४ जनालाई ८ वर्ष जेल

सुरक्षा-अपराध

गृहपृष्ठ
सुरक्षा-अपराध
भ्रष्टाचार प्रकरणमा पूर्व सचिव ठाकुरसहित ४ जनालाई ८ वर्ष जेल

भ्रष्टाचार प्रकरणमा पूर्व सचिव ठाकुरसहित ४ जनालाई ८ वर्ष जेल

मंगलबार, असोज ८, २०८१ बागेश्वरी पोस्ट

काठमाडौँ । विशेष अदालतले मेलम्ची खानेपानी आयोजनामा भएको भ्रष्टाचारको मुद्दामा दोषी ठहर भएका तीन कम्पनी र चार व्यक्तिलाई सजाय निर्धारण गरेको छ ।

अदालतका अध्यक्ष टेकनारायण कुँवर, सदस्यद्वय तेजनारायण सिंह राई र मुरारीबाबु श्रेष्ठको इजलासले दोषी ठहर भएका तीन कम्पनी र चार व्यक्तिलाई सजाय निर्धारण गरेको हो ।

अदालतले गत भदौ २५ उक्त खानेपानी आयोजनाको भ्रष्टाचार गरेको प्रकरणमा पूर्व सचिव गजेन्द्रकुमार ठाकुरसहित चार जनालाई दोषी ठहर गरेको थियो । आज सो फैसलाको सजाय निर्धारण गर्दै पूर्व सचिव ठाकुरसहित चार जनालाई जनही आठ वर्ष कैद ठहर गरेको हो ।

अदालतले सजाय निर्धारण गर्दा पूर्व सचिव तथा मेलम्ची खानपानी समितिका तत्कालीन अध्यक्ष रहेका पूर्व सचिव गजेन्द्र ठाकुर र समितिका कार्यकारी निर्देशक सूर्यराज कँडेललाई जनही आठ वर्ष एक महिना कैद र जरिबाना रु. १० करोड १० लाख ६१ हजार ७५ निर्धारण गरेको छ ।

अदालतले तत्कालीन खानेपानी विकास र समितिका कार्यकारी निर्देशक तथा लेखा उत्तरदायी अधिकारी समेत रहेका रामचन्द्र देवकोटालाई आठ वर्ष एक महिना कैद र रु. दुई करोड ९५ लाख ६५ हजार छ सय ३ जरिबाना र परामर्शदाता कम्पनी इप्टिसा जेभीका टिम लिडर शिवकुमार शर्मालाई आठ वर्ष कैद तर ज्येष्ठ नागरिक भएकाले दुई वर्ष कैद छुट र रु. दुई करोड ९५ लाख ६५ हजार छ सय ३ जरिबाना रहेको छ ।

अदालतले दोषी ठहर गरी सजाय निर्धारण गरेका कम्पनीमा ईपीआईआईएसए मतियार ठहर जरिबाना रु. छ करोड २१ लाख ९३ हजार पाँचसय ९६ रहेको छ । बीईटीएसलाई मतियार ठहर गर्दै जरिबाना रु. दुई करोड ९५ लाख ६५ हजार छ सय तीन गरेको छ भने सीएमसी डी राभेनालाई रु. २६ करोड ११ लाख छ हजार नौ सय ९१ जरिबाना गरेको छ ।

अख्तियार दुरूपयोग अनुसन्धान आयोगले वि.सं. २०८० फागुन ६ गते विशेषमा उक्त प्रकरणमा मुद्दा दायर गरेको थियो । उक्त मुद्दामा अदालतले डा. सञ्जय शर्मा, पूर्व सचिव भीमप्रसाद उपाध्याय, मुकुन्दप्रसाद पौडेल, रुद्रसिंह तामाङ, चन्द्रबहादुर थापा, घनश्याम भट्टराई, मणिभद्र न्यौपाने, भोजविक्रम थापा, रामचन्द्र न्यौपाने, वेगनाथ पौडेल र केदारप्रसाद अर्याललाई सफाई दिएको थियो ।

प्रकाशित मिति: मंगलबार, असोज ८, २०८१ १०:१४

प्रतिक्रिया दिनुहोस्