नेपालगन्जका सडकबाट छाडा पशु कान्जीहाउस लगिँदै

स्थानीय

गृहपृष्ठ
स्थानीय
नेपालगन्जका सडकबाट छाडा पशु कान्जीहाउस लगिँदै

नेपालगन्जका सडकबाट छाडा पशु कान्जीहाउस लगिँदै

शनिबार ५८ पशुचौपाया कान्जीहाउस लगियो

आइतबार, असोज २०, २०८१ बागेश्वरी पोस्ट

नेपालगञ्ज । सडकमा छाडा छोडिएका पशुचौपायाको बिगबिगीले दुर्घटनाको जोखिम बढाएपछि नेपालगञ्ज उपमहानगरपालिकाले प्रत्येक शनिबार सडकमा छाडा छोडिएका पशुचौपायालाई कान्जीहाउस पुर्याउने गरेको छ ।

शनिवारको दिन नगरका विभिन्न सडकमा छरिएर रहेका पशुचौपायालाई एकत्रित गरेर नेपालगञ्ज उपमहानगरपालिका वडा नम्बर २१ विर्तास्थित कान्जीहाउस पुर्याउने गरिएको हो । नगर प्रहरी, नेपाल प्रहरी, ट्राफिक प्रहरीको संयुक्त टोलीले छाडा पशुचौपायालाई कान्जीहाउस पुर्याउने गरेको छ । यो शनिवार पनि ५८ वटा पशुचौपायालाई कान्जीहाउस लगिएको नगर प्रहरी प्रमुख सूर्य बहादुर बोगटीले जानकारी दिए । बोगटीका अनुसार गाई तथा बाच्छा बाच्छी ३४, १५ वटा घोडा र ९ वटा बाख्रालाई कान्जीहाउस पुर्याइएको छ ।

घरधनीले आफ्नो पशुहरु सडकमै छोडिदिने र खुला सीमा नाकाका कारण पनि नेपालगञ्जका सडकमा छाडा पशुचौपायाको संख्या उल्लेख्य हुने गरेको छ । छाडा पशुका कारण साना ठूला दुर्घटना भइरहेका हुन्छन् । कतिले ज्यानै गुमाउनुपरेको अवस्था छ भने कति घाइते हुने गरेका छन् ।

नेपालगञ्ज उपमहानगरपालिकाका नगर प्रमुख प्रशान्त विष्टले आ-आफ्ना पशुचौपाया घरमै बाँध्न आग्रह गर्दै आएका छन् । तर, छाडा छोड्ने प्रबृत्ति रोकिएको छैन । नगर प्रमुख विष्टले नगरबासी सबैले यसमा गम्भीरता देखाउनुपर्ने बताए । "छाडा पशुरहित सडक बनाउन सबैको सहयोग आवश्यक छ," उनले भने ।

प्रकाशित मिति: आइतबार, असोज २०, २०८१ ०९:०४

प्रतिक्रिया दिनुहोस्