पटकाको जथाभावी विक्री र पट्काउने कार्य रोक्न प्रशासनको ध्यानाकर्षण

स्थानीय

गृहपृष्ठ
स्थानीय
पटकाको जथाभावी विक्री र पट्काउने कार्य रोक्न प्रशासनको ध्यानाकर्षण

पटकाको जथाभावी विक्री र पट्काउने कार्य रोक्न प्रशासनको ध्यानाकर्षण

बिहीबार, कात्तिक ८, २०८१ बागेश्वरी पोस्ट

नेपालगञ्ज । तिहारको समयमा अनावश्यक रुपमा प्रयोग हुने पटका, झिरझिरे, आतिशबाजी नियन्त्रणका लागि जिल्ला प्रशासन कार्यालय बाँकेको ध्यानाकर्षण गरिएको छ । बास नेपालले आज बाँकेका प्रमुख जिल्ला अधिकारी खगेन्द्र प्रसाद रिजाललाई ज्ञापनपत्र बुझाउँदै तिहारको समयमा हुने यस्ता कार्यहरु नियन्त्रण गर्न प्रशासनको ध्यानाकर्षण गराएको हो ।

ध्यानाकर्षणपत्रमा नेपालीहरुको महान पर्ब तिहार नजिकिँदै गर्दा खुला सिमानाका कारण पटका, झिरझिरे लगायत पट्काउने, बाल्ने, आतिशबाजी गर्ने कार्य विगतका बर्षहरुदेखि ब्यापकरुपमा हुने गरेको र यस बर्ष समेत आम नागरिकहरु आतंकित हुने गरी सो कार्य हुन सक्ने भन्दै ध्यानाकर्षण गराइएको हो । भारतीय खुला सिमानाको फाइदा उठाउँदै गैरकानुनीरुपमा भित्र्याइने यस्ता सामग्रीहरुको बिक्री वितरणमा रोक लगाउन माग गरिएको छ ।

विगतको समयमा लुकिछिपी बिक्री वितरण हुने गरेकोमा पछिल्लो समय खुल्लम-खुल्ला बिक्री हुनुका साथै पट्काउने गरिएको ज्ञापनपत्रमा उल्लेख छ । केही ब्यक्तिको मनोरञ्जन र आत्मरतिका नाममा बालबालिका, जेष्ठ नागरिक लगायतका व्यक्तिहरुलाई पर्न सक्ने शारिरिक, मानसिक असरलाई मध्यनजर गर्दै प्रशासनलाई गम्भीर बन्न अनुरोध गरिएको छ । प्रहरी प्रशासनको सक्रियता विना यस्ता गैरकानूनी क्रियाकलापले प्रश्रय पाउने भएकाले यथाशक्य सो क्रियाकलापहरुको नियन्त्रणका लागि सार्वजनिक सूचना जारी गर्न र कडा निगरानीसहित पूर्णरुपमा पटाका लगायतका पदार्थहरुमा प्रतिबन्ध लगाउन अनुरोध गरिएको छ । सार्वजनिक सूचना जारी गर्दा गर्दै यस्ता कार्यहरु गर्ने जो-कोहीलाई पनि मुलुकी अपराध संहिता २०७४ को बिष्फोटक पदार्थ सम्बन्धि कसुर अन्तरगत कार्वाही गर्न समेत अनुरोध गरिएको छ ।

ध्यानाकर्षणपत्र बुझ्दै बाँकेका प्रमुख जिल्ला अधिकारी रिजालले प्रशासनले यस्ता कार्यमा कडाईका साथ निगरानी गर्ने प्रतिबद्धता ब्यक्त गरे । बासका केन्द्रीय उपाध्यक्ष शिब कुमार बर्माले प्रजिअ रिजाललाई ध्यानाकर्षणपत्र बुझाएका थिए ।सो क्रममा प्रजिअ रिजाल, सहायक प्रमुख जिल्ला अधिकारी दत्तराज हमाल, सहायक प्रमुख जिल्ला अधिकारी खडानन्द खत्री, बासका केन्द्रीय उपाध्यक्ष शिव कुमार बर्मा, निर्देशक हेमराज भट्ट, कार्यक्रम प्रबन्धक मन भण्डारी र शोभा थापा मगरको उपस्थिति रहेको थियो

प्रकाशित मिति: बिहीबार, कात्तिक ८, २०८१ २०:०९

प्रतिक्रिया दिनुहोस्