मानव बेचविखनविरुद्ध नेपालगञ्जमा प्रशिक्षण कार्यक्रम

स्थानीय

गृहपृष्ठ
स्थानीय
मानव बेचविखनविरुद्ध नेपालगञ्जमा प्रशिक्षण कार्यक्रम

मानव बेचविखनविरुद्ध नेपालगञ्जमा प्रशिक्षण कार्यक्रम

बुधबार, मंसिर ५, २०८१ बागेश्वरी पोस्ट

चन्द्रप्रसाद जैसी/नेपालगञ्ज । नेपालगञ्जमा मानव बेचविखनविरुद्ध (एन्टी ह्युमन ट्राफिकिंग) प्रशिक्षण कार्यक्रम गरिएको छ । सहयात्री नेपाल युथ फेलोशिपको आयोजनामा भएको कार्यक्रम मंसिर ४ र ५ गते गरी दुई दिन सञ्चालन गरिएको थियो । पहिलो दिनको प्रशिक्षण माइती नेपाल नेपालगञ्जका प्रमुख केशव कोइराला तथा दोस्रो दिन प्रहरी निरीक्षक शिभा थापाले प्रशिक्षण दिएका थिए ।

माइती नेपाल नेपालगञ्जका प्रमुख कोइरालाले नेपालगञ्ज सीमावर्ती सहर भएकाले यो नाकामा मानव बेखविखनको उच्च जोखिम रहेको बताए । उनले महिला तथा बालबालिका बेचबिखनको जोखिममा रहेको उल्लेख गरे । पछिल्लो समय सामाजिक सञ्जालको दुरुपयोग भइरहेको उनको भनाई छ । ललाइफकाई, विभिन्न प्रपञ्च रचेर, थुप्रै आर्थिक प्रलोभन देखाएर जालसाजी गरी विभिन्न माध्यमबाट महिला तथा बालबालिकालाई फन्दामा पार्ने गरिएको उनले बताए । माइती नेपाल नेपालगञ्जमा बार्षिक ५ देखि ६ सय खोजी उद्दारको लागि उजुरी आउने गरेको छ ।

प्रहरी निरीक्षक थापाले मानव बेचविखन विश्वका तीन ठूला अपराध मध्येको घातक र क्रुर अपराध भएको बताइन् । मानव बेचबिखन कानुन विरुद्धको गम्भीर सामाजिक अपराध र ब्यक्तिको प्रतिष्ठामाथिको ब्यापार भएकाले यो मानव अधिकारको गम्भीर उल्लंघन भएको उनको भनाई छ । उनका अनुसार मानव बेचबिखन गर्नेलाई २० बर्ष कैद र २ लाख जरिवाना, बेश्याबृत्तिमा लगाउनेलाई कसुरको मात्रा अनुसार १० देखि २० बर्ष कैद र पचास हजारदेखि १ लाखसम्म जरिवाना हुने कानुनी ब्यवस्था छ । थापाले बेचबिखन हुनबाट बच्ने र बचाउने उपाय, कानुनी प्रावधान, बेचबिखन न्यूनीकरणका उपाय लगायतका बिषयमा प्रशिक्षण दिएकी थिइन् ।

उक्त कार्यक्रममा सहयात्री नेपालमा अध्यक्ष रितिक शाही, उपाध्यक्ष अरुणा गुरुङ,, श्वेता गुरुङ, अन्जना सुवेदी, संस्थापक प्रतिनिधि र दर्जन बढी युवाको सहभागिता रहेको थियो ।

प्रकाशित मिति: बुधबार, मंसिर ५, २०८१ २१:१२

प्रतिक्रिया दिनुहोस्