बैकुण्ठधाम महोत्सवमा तीन करोड संकलन, ७५ लाख खर्च

स्थानीय

गृहपृष्ठ
स्थानीय
बैकुण्ठधाम महोत्सवमा तीन करोड संकलन, ७५ लाख खर्च

बैकुण्ठधाम महोत्सवमा तीन करोड संकलन, ७५ लाख खर्च

शुक्रबार, मंसिर १४, २०८१ बागेश्वरी पोस्ट

नेपालगन्ज । बैकुण्ठधाम आध्यात्मिक महोत्सवमा तीन करोड संकलन भएको छ । बाँके जिल्लाको राप्ती नदी किनारमा सिधनियाघाट बहुआयामिक वैकुण्ठधाम परियोजना निर्माणका लागि गत कार्तिक २२ देखि ३० गतेसम्म आयोजित महोत्सवमा ३ करोड ३ लाख १५ हजार ४ रुपैयाँ संकलन भएको मूल समारोह समिति कोषाध्यक्ष कृष्ण प्रसाद श्रेष्ठले जानकारी दिए ।

नेपालगन्जमा आज आयोजित पत्रकार सम्मेलनमा आयब्यय विवरण सार्वजनिक गर्दै श्रेष्ठले १ करोड २७ लाख ७३ हजार १ सय १४ रुपैयाँ, क्युआरमार्फत २६ लाख ६३ हजार १ सय ७९, चेकमार्फत ८८ लाख ३४ हजार ६ सय ७४ र घोषणा गरिएको रकम ६० लाख ४४ हजार ४७ रुपैयाँ आम्दानी भएको बताउनुभयो । यस्तै १ कट्ठा २६ धुर जग्गा पनि प्राप्त भएको छ । नेपालगन्ज उपमहानगरपालिकाका प्रमुख प्रशान्त विष्टले डुडुवा-४ बाँकेमा १ कट्ठा तथा वडा नम्बर १८ का वडा अध्यक्ष दीपककुमार बर्माले नेपालगन्ज-१९ मा २६ धुर जग्गा दान गरेका छन् । श्रेष्ठले महोत्सव संचालनका दौरान ७५ लाख रुपैयाँ खर्च भएको जानकारी दिए ।

महोत्सव मूल समारोह समिति संयोजक डा. सुरेश कुमार कनोडियाले मानव जीवनको अन्तिम विश्रामस्थल सिधनियाघाट निर्माण सहयोगार्थ संचालित बैकुण्ठधाम आध्यात्मिक महोत्सव सफलतापूर्वक सम्पन्न भएको बताए । कनोडियाले यो पुनित कार्यमा सबैको साथ र सहयोग रहने विश्वास व्यक्त गरे । उनले यो कार्यलाई जसरी पनि टुंगोमा पुर्याउने दृढता व्यक्त गरे । महोत्सवमा कथा वाचन पण्डित दीनबन्धु पोखरेलले गरेका थिए ।

प्रकाशित मिति: शुक्रबार, मंसिर १४, २०८१ १६:०५