सामाजिक सद्भावसम्बन्धि तीन दिने तालिम शुरु

स्थानीय

गृहपृष्ठ
स्थानीय
सामाजिक सद्भावसम्बन्धि तीन दिने तालिम शुरु

सामाजिक सद्भावसम्बन्धि तीन दिने तालिम शुरु

बिहीबार, पुस ४, २०८१ बागेश्वरी पोस्ट

नेपालगञ्ज । अन्तर धार्मिक युवा समितिका पदाधिकारीहरुका लागि तीन दिने क्षमता अभिबृद्धि तालिम नेपालगञ्जमा शुरु भएको छ । नाइस नेपालगञ्जले युएसएड नागरिक समाज र सञ्चार कार्यक्रमको सहकार्यमा सामाजिक सद्भावका लागि सँगै परियोजना अन्तरगत सामाजिक सद्भाव सम्बन्धि तीन दिने क्षमता अभिबृद्धि तालिम सञ्चालन गरेको छ ।

नेपालगञ्ज उपमहानगरपालिका र नरैनापुर गाउँपालिकामा रहेको अन्तर धार्मिक युवा समितिका २४ जना पदाधिकारीहरुको सहभागिता रहेको तालिमको उद्घाटन सत्रमा बोल्दै द एसिया फाउण्डेसनका कार्यक्रम निर्देशक अजय दासले सामाजिक सद्भावको बिषय सबैको साझा बिषय भएकाले निरन्तर सद्भावमा काम गरिरहन अनुरोध गरे । उनले समाजमा फैलिने मिथ्या सूचनाको पछाडि नलागेर सही र सत्यतथ्य सूचनालाई बाहिर ल्याउने भूमिका खेल्न युवाहरुलाई आग्रह गरे । उनले तीन दिने तालिममा सिकेको कुरालाई ब्यवहारमा लागू गर्न आग्रह गरे । सामाजिक सद्भावमा युवाको भूमिका महत्वपूर्ण भएकाले मिथ्या सूचनालाई निरुत्साहित गरी सत्यतथ्य सूचनाको वाहकको रुपमा काम गर्न दासको सुझाब छ ।

कार्यक्रममा बोल्दै द एसिया फाउण्डेसनकी उप–प्रमुख प्रिती थापाले युवाहरुको अगुवाईमा समाजमा सद्भाव कायम गर्न र सद्भावका लागि स्थानीय युवालाई नै अगुवाको रुपमा विकसित गर्न कार्यक्रमको आयोजना गरिएको बताइन् । उनले युवाहरुको समूहमार्फत सामाजिक सद्भावका लागि महत्वपूर्ण कार्य हुने विश्वास ब्यक्त गरिन् ।

नाइस नेपालगञ्जका अध्यक्ष हेमराज भट्टको अध्यक्षतामा भएको तालिमको उद्घाटनमा तालिमको उद्देश्यमाथि प्रकाश पार्दै द एसिया फाउण्डेसन नागरिक समाज र मिडिया परियोजनाका इन्द्र टमाटाले अन्तर धार्मिक युवा समितिका पदाधिकारीहरुको क्षमता अभिबृद्धि गर्ने, सामाजिक सद्भाव, नेतृत्व विकास र समुदाय परिचालनका बिषयमा ज्ञान र सीपको विकास गर्ने र भविष्यमा धार्मिक अगुवा बन्न उत्प्रेरित गर्ने हेतुले तालिमको आयोजना गरिएको बताए । तालिम उद्घाटन कार्यक्रमको सञ्चालन नाइसका कार्यक्रम प्रबन्धक जोशिना थारुले गरेकी थिइन् ।

तालिमको पहिलो दिन सामाजिक सद्भाव, सूचनाका विभिन्न बिषयमा द एसिया फाउण्डेसनका कार्यक्रम निर्देशक दास, उपप्रमुख थापा र प्रशिक्षक हरिप्रसाद सुबेदीले प्रशिक्षण दिएका छन् । तालिमको पहिलो दिन सामाजिक सद्भाव, दोश्रो दिन नेतृत्व विकास र तेस्रो दिन समुदाय परिचालनका बिषयमा तालिम प्रदान गरिनेछ ।

प्रकाशित मिति: बिहीबार, पुस ४, २०८१ १९:११

प्रतिक्रिया दिनुहोस्