पत्रकार महासंघका नवनिर्वाचित पदाधिकारीलाई नेपालगञ्ज-१ को बधाई

स्थानीय

गृहपृष्ठ
स्थानीय
पत्रकार महासंघका नवनिर्वाचित पदाधिकारीलाई नेपालगञ्ज-१ को बधाई

पत्रकार महासंघका नवनिर्वाचित पदाधिकारीलाई नेपालगञ्ज-१ को बधाई

मंगलबार, पुस ९, २०८१ बागेश्वरी पोस्ट

नेपालगञ्ज । नेपालगञ्ज उपमहानगरपालिका वडा नम्बर १ ले नेपाल पत्रकार महासंघका नवनिर्वाचित पदाधिकारी एवम् सदस्यहरुलाई बधाई ज्ञापन गर्दैै सम्मान गरेको छ । वडा कार्यालय धम्बोझीमा आज एक कार्यक्रमका बीच वडाले बधाई ज्ञापन गर्दै सफल कार्यकालको शुभकामना ब्यक्त गरेको हो ।

वडा अध्यक्ष प्रमोद रिजालको अध्यक्षतामा भएको कार्यक्रममा बाँकेबाट लुम्बिनी प्रदेश अध्यक्षमा निर्वाचित शुक्रऋषि चौलागाई, सचिव गोविन्द शर्मा, बाँके शाखा अध्यक्ष नवीन गिरी लगायत जिल्ला शाखाका पदाधिकारी र सदस्यहरुलाई टीका र खादा लगाई मायाको चिनो प्रदान गरी सम्मान गरिएको हो ।

कार्यक्रममा बोल्दै प्रदेश अध्यक्ष चौलागाईले पत्रकार महासंघ र सञ्चार माध्यमको विकास र प्रबद्र्धनका लागि स्थानीय सरकारले विशेष चासो दिनुपर्नेमा जोड दिए । सचिव शर्माले स्थानीय सरकार र मिडियाले सहकार्य गरेर जानुपर्नेमा जोड दिए । बाँके शाखा अध्यक्ष गिरीले महासंघको संस्थागत विकास तथा मिडिया र पत्रकारहरुको बृत्ति विकासका लागि सहकार्य गर्न वडा कार्यालयलाई आग्रह गरे ।

वडा अध्यक्ष रिजालले विगतदेखि नै पत्रकार महासंघसंग सहकार्य र हातेमालो गर्दै आएको स्मरण गराउँदै आगामी दिनमा पनि त्यसरी नै अगाडि बढ्ने प्रतिबद्धता ब्यक्त गरे । उनले नयाँ पत्रकारहरुको क्षमता विकासका लागि सहकार्य गर्न इच्छुक रहेको प्रष्ट पारे । नेपालगञ्ज उपमहानगरपालिकाका प्रबक्ता समेत रहेका रिजालले पत्रकार महासंघ र मिडिया तथा पत्रकारसंगको सहकार्यको दायरा अझ फराकिलो बनाइने बताए । कार्यक्रममा वडा सदस्य जगमोहन काँदुले स्वागत मन्तब्य ब्यक्त गरेका थिए ।

त्यस क्रममा वडा अध्यक्ष रिजालले वडाका मुख्य मुख्य कामबारे पत्रकारहरुलाई जानकारी समेत गराएका थिए । रिजालका अनुसार वडामा रहेका सबै श्रम गर्ने विविध क्षेत्रका ३५० भन्दा बढी मजदुरहरुको निःशुल्क म्यादी बीमा गरिएको छ । वडाबासीको मृत्यु संस्कारमा आवश्यक रु. ५ हजार बराबरको दाउरा उपलब्ध गराउँदै आएको, वडाका सबै घरहरुमा डिजिटल घर नम्बरिंग सुरु गरिएको, १५ वटा टोल विकास समिति र एउटा वडा स्तरीय टोल समन्वय समिति गठन गरी परिचालन गरिएको, वडाबासीको घर तथा विद्यालय, उद्योग र ब्यापारिक भवन, होटेलबाट निस्कने फोहोरको ब्यवस्थापन वडाको आफ्नै ट्याक्टरमार्फत हुँदै आएको, वडामा हरियाली प्रबद्र्धन तथा सौन्दर्यकरण र ऐतिहासिक मठमन्दिरको जिर्णोद्दार तथा सौन्दर्यकरण लगायतका काम गरेको उनको भनाई छ ।

यस्तै खेलकुदतर्फ एन्फा स्पोर्ट्स एकेडेमी, धम्बोझी ब्याडमिन्टन प्रशिक्षण केन्द्र, साइकल पम्प ट्र्याक निर्माण, योगा भवन निर्माणाधीन अवस्थामा रहेको उनले जानकारी दिए । आर्थिक पारदर्शिताको लागि सार्वजनिक परीक्षण र सार्वजनिक सुनुवाई नियमितरुपमा गरिएको, सबै टोलमा कालोपत्रे सडक निर्माण गर्ने अभियान अन्तर्गत सबै टोलमा कालोपत्रे सडकको पहुँच बढाएको, कोरोनाकालमा घर-घरमा विशेषज्ञ चिकित्सकसहितको टोली परिचालन गरी सेवा प्रदान गरिएको तथा वडा कार्यालयको आफ्नै भवन निर्माण भई स्वास्थ्य सेवा तथा प्रशासनिक सेवा प्रदान गरिरहेको वडा अध्यक्ष रिजालले बताए ।

प्रकाशित मिति: मंगलबार, पुस ९, २०८१ २०:२८