नेपाली टोपी दिवस नेपालगञ्जमा पनि मनाइयो

स्थानीय

गृहपृष्ठ
स्थानीय
नेपाली टोपी दिवस नेपालगञ्जमा पनि मनाइयो

नेपाली टोपी दिवस नेपालगञ्जमा पनि मनाइयो

बुधबार, पुस १७, २०८१ बागेश्वरी पोस्ट

नेपालगञ्ज । विश्वभरी नेपालीको पहिचान झल्काउने नेपाली टोपी दिवस नेपालगञ्जमा पनि मनाइएको छ । बास नेपालको आयोजनामा आज गणेशमान चोकमा टोपी दिवस मनाइएको हो ।

नेपाली टोपी दिवस कार्यक्रममा बोल्ने बक्ताहरुले नेपालको नेतृत्व तहमा रहेका ब्यक्तिले टोपी लगाउन लाज मानिरहेको अवस्थामा हरेक नागरिकले नेपाली टोपी र पोशाकको जगेर्ना गर्नुपर्नेमा जोड दिएका थिए । नेपाल सरकारले नेपाली टोपी र दौरा-सुरुवाललाई राष्ट्रिय पोशाकको रुपमा अनिवार्य गरे पनि उच्च पदस्थ व्यक्तिहरु समेतले राष्ट्रिय पोशाकलाई बेबास्ता गर्दा राष्ट्रियताको बिषय नै ओझेल परेको बक्ताहरुले बताएका थिए ।

बास नेपालका कार्यकारी निर्देशक नमस्कार शाहले नेपालीको पहिचान बोकेको टोपी संकटमा पर्नु भनेको नेपाली पहिचान नै संकटमा पर्नु हो भन्ने कुरालाई महसुस गर्दै नेपालमा २०७० सालदेखि टोपी दिवस मनाउन सुरु गरिएको बताए । काठमाण्डौंबाट शुरु गरिएको यो दिवस बिगत ५ बर्ष यता बाँकेमा बास नेपालले मनाउँदै आएको शाहले जानकारी दिए । नेपालमा कालोटोपी, भादगाउँले टोपी र ढाका टोपीलाई नेपाली टोपीको रुपमा चिनिँदै आएको उल्लेख गर्दै शाहले यस प्रकारको टोपी बिश्वमै अलग प्रकारको भएको बताए ।

कार्यक्रममा बोल्दै नेपालगञ्ज उपमहानगरपालिकाकी निबर्तमान उपप्रमुख उमा थापा मगरले नेपालीको पहिचानको रुपमा टोपी सबैलाई प्रयोग गर्न आग्रह गरिन् । कार्यक्रममा मुस्लिम अगुवा कादिर अन्सारी, सुटिंगका राष्ट्रिय खेलाडी रमेश मल्ल, गैसस महासंघ नेपाल बाँकेका अध्यक्ष चन्द्र प्रसाद तिमिल्सिना, पत्रकार शकिल अहमद कादरी लगायतले बोलेका थिए ।

बासका कार्यक्रम अधिकृत रबिन्द्र बोहराले सञ्चालन गरेको कार्यक्रममा धन्यबाद ज्ञापन बास नेपालका केन्द्रीय उपाध्यक्ष शिबकुमार बर्माले गरेका थिए । कार्यक्रममा विभिन्न सरकारी, गैरसरकारी, ब्यवसायी, बिद्यार्थी लगायतको सहभागिता रहेको थियो । त्यसैगरी बास नेपाल बझांग शाखा, दैलेख शाखा, सुर्खेत शाखा, दार्चुला शाखा, डोटी शाखा लगायतले टोपी दिवस मनाएको बासका सूचना अधिकारी हेमराज भट्टले जानकारी दिए ।

प्रकाशित मिति: बुधबार, पुस १७, २०८१ २१:०४

प्रतिक्रिया दिनुहोस्