रोजगारीमा खटिनु पूर्व अभिमुखीकरण

स्थानीय

गृहपृष्ठ
स्थानीय
रोजगारीमा खटिनु पूर्व अभिमुखीकरण

रोजगारीमा खटिनु पूर्व अभिमुखीकरण

सोमबार, माघ ७, २०८१ बागेश्वरी पोस्ट

कोहलपुर । प्रधानमन्त्री रोजगार कार्यक्रम अन्तर्गत कोहलपुर नगरपालिका रोजगार सेवा केन्द्रले श्रममा आधारित योजनामा खटिने श्रमिकहरुलाई रोजगारीमा खटिनु पूर्व अभिमुखीकरण गराएको छ । आज कोहलपुरमा आयोजित कार्यक्रममा पहिलो चरणमा ५० जनालाई अभिमुखीकरण गरिएको केन्द्रका संयोजक आशिष वर्माले जानकारी दिए । उनका अनुसार कामको जोखिम, अपनाउनुपर्ने सावधानी, आयोजनाको प्रकृति, सम्झौता, भुक्तान प्रक्रिया लगायतका विषयमा उनीहरुलाई जानकारी प्रदान गरिएको हो ।

श्रममा आधारित योजनाका लागि चालू आर्थिक बर्षमा कोहलपुर नगरपालिकाका ८ वटा वडामा १७ वटा योजना छनौट भएका छन् । पहिलो चरणमा ५ वटा योजनाका लागि ५० जना श्रमिकले फारम भरेका थिए । उनीहरुलाई अभिमुखीकरण गरिएको हो । वडा नम्बर २, ३, ४, ५ र ८ का ५० जना श्रमिकलाई बोलाएर जानकारी दिने काम गरिएको केन्द्रका संयोजक वर्माले बताए ।

उनीहरुले एक दिन काम गरेवाफत ६६८ रुपैयाँ पाउने केन्द्रका प्राविधिक ललित रेग्मीले बताए । उक्त रकम सिधै उनीहरुको बैंक खातामा जानेछ । उनीहरुले कामको आवश्यकता अनुसार एक सय दिनसम्म काम गर्न पाउनेछन् । वडाको आवश्यकता अनुसार उनीहरुले नाला सफाई, बाटो मर्मत, नयाँ बाटोको ट्रयाक खुलाउने जस्ता काम गर्ने रेग्मीले बताए ।

रोजगार तथा सामाजिक सुरक्षा मन्त्रालयबाट २०८१÷०८२ को रोजगार सेवा केन्द्र कोहलपुरको लागि स्वीकृत वार्षिक कार्यक्रम अन्तर्गत रोजगारीमा खटिनु पूर्व श्रमिकहरुलाई अभिमुखीकरण कार्यक्रम गरिएको संयोजक वर्माले बताए ।

प्रकाशित मिति: सोमबार, माघ ७, २०८१ २०:४६