कोहलपुरमा अलुम्नाई मिटअप

स्थानीय

गृहपृष्ठ
स्थानीय
कोहलपुरमा अलुम्नाई मिटअप

कोहलपुरमा अलुम्नाई मिटअप

सोमबार, माघ १४, २०८१ बागेश्वरी पोस्ट

नेपालगञ्ज । बालिका शिक्षा कार्यक्रम अन्तर्गत कक्षा १२ पास गरेका बालिका (अलुम्नाई) सँग भेटघाट कार्यक्रम गरिएको छ । रुम टु रिडको आर्थिक तथा प्राविधिक सहयोगमा बास नेपालद्वारा आज कोहलपुरमा उक्त अलुम्नाई मिटअप गरिएको हो । अलुम्नाई बालिकाहरुको प्रगतिका बारेमा जानकारी लिने, सफलताका कथा तथा अनुभव आदानप्रदान गर्ने र अलुम्नाईसँगको सम्बन्धलाई बढावा दिने उद्देश्यले मिटअप गरिएको हो ।

कार्यक्रमको उद्घाटन सत्रमा स्वागत तथा कार्यक्रमको उद्देश्यमाथि प्रकाश पार्दै बास नेपाल बालिका शिक्षा कार्यक्रम संयोजक हेमराज भट्टले अलुम्नाईहरुसँग भेटघाट र अनुभव आदानप्रदान गर्न कार्यक्रमको आयोजना गरिएको बताए । कार्यक्रममा बोल्दै बास नेपालका केन्द्रीय अध्यक्ष लुना बुढाथोकीले बालिका शिक्षा कार्यक्रमसँग जोडिएका बालिकाहरुमा आएको आत्मविश्वास र सफलता सुन्दा उत्साहित भएको बताइन् ।

बास नेपाल बालिका शिक्षा कार्यक्रमका बरिष्ठ सामाजिक परिचालक शोभा भण्डारीले सहजीकरण गरेको कार्यक्रममा क्यारियर काउन्सिलिंग र उत्प्रेरणाका बिषयमा परियोजना संयोजक भट्टले प्रस्तुतिकरण गरेका थिए । कार्यक्रममा बालिका शिक्षा कार्यक्रममा आबद्ध किशोरीहरुको सफलताको कथासहित रुम टु रिडले तयार पारेको भिडियो देखाइएको थियो ।

कार्यक्रमका सहभागी अलुम्नाई ममता बुढा, सरिता न्यौपाने, संगिता सार्की, निशा बिष्ट, राजमती थारु, महिमा योगी, शान्ति बुढा, करिष्मा बिक, निर्मला सापकोटा, मनिषा चौधरी, कल्पना मल्ल लगायतले आफ्नो अनुभव आदानप्रदान गरेका थिए । अनुभव आदानप्रदान गर्दै अल्मुनाईले बालिका शिक्षा कार्यक्रमले जीवन जिउने कला, बोल्ने कला, निर्णय गर्ने क्षमता, जीवनका आवश्यकतालाई प्राथमिकीकरण कसरी गर्ने, आफूलाई परेको समस्यालाई कसरी समाधान गर्ने लगायतका बिषयमा सहयोग गरेको बताएका थिए ।

कार्यक्रममा अल्मुनाईको सफलताको कथा, अनुभव आदानप्रदानसँगै उनीहरुको क्षमता उजागर गर्न ट्यालेन्ट शो समेत गरिएको थियो । कार्यक्रममा बालिका शिक्षा कार्यक्रम अन्तर्गत पूर्व अलुम्नाई तथा सामाजिक परिचालक सिता कुमारी चौधरीले बालिका शिक्षा कार्यक्रममा आबद्ध भएपछिको अनुभव आदानप्रदान गरेकी थिइन् । कार्यक्रममा ५० अलुम्नाईको सहभागिता रहेको थियो ।

कोहलपुर, राप्तीसोनारी र बैजनाथका विभिन्न बिद्यालयहरुबाट कक्षा १२ पास गरी क्याम्पस तथा विभिन्न क्षेत्रमा कार्यरत बालिकाहरुलाई एकै ठाउँमा भेला गराएर कार्यक्रम गरिएको थियो । कार्यक्रममा बास नेपालका लेखा अधिकृत हंस बहादुर शाही, बरिष्ठ सामाजिक परिचालक रचना चौधरी, सबिता सुनार र सुस्मिता लामाको सहभागिता रहेको थियो ।

प्रकाशित मिति: सोमबार, माघ १४, २०८१ १८:४८

प्रतिक्रिया दिनुहोस्