प्रादेशिक महोत्सवमा अर्गानिक खाद्यबस्तुमा ग्राहकको आकर्षण

अर्थ

गृहपृष्ठ
अर्थ
प्रादेशिक महोत्सवमा अर्गानिक खाद्यबस्तुमा ग्राहकको आकर्षण

प्रादेशिक महोत्सवमा अर्गानिक खाद्यबस्तुमा ग्राहकको आकर्षण

मंगलबार, माघ १५, २०८१ बागेश्वरी पोस्ट

नेपालगञ्ज । प्रादेशिक महोत्सव नेपालगञ्जमा हिमाली र पहाडी जिल्लाका अर्गानिक खाद्यबस्तु ग्राहकको आकर्षणमा परेका छन् । अर्गानिक कोसेली फुड इन्डष्ट्रिज प्रा.लि.की सञ्चालक इन्दिरा शाहीका अनुसार ड्राइफुड मिश्रित सातु किन्ने ग्राहक बढी आउने गरेका छन् । उनको पसलमा हिमाली र पहाडी भेगका खाद्यान्न वस्तु, लसुन, खुर्सानी, डल्ले खुर्सानी, टिमुरको छोप, सेलरोटी, जुम्ली अर्सा बिक्री भइरहेको छ । सञ्चालक शाही भन्छिन्, ‘दैनिक औसत दश हजार रुपैयाँ बराबरको बिक्री भइरहेको छ ।’

महोत्सबको स्टलभित्र प्रवेश गर्ने वित्तिकै पैंचो पसलको स्टल भेटिन्छ । यो स्टलमा 'बसे पनि शहर, गाउँकै खाने रहर' नारा लेखिएको छ । पैंचोमा स्वदेशी उत्पादनका धेरै खाद्य वस्तुहरु राखिएका छन् । जहाँ लुम्बिनी प्रदेशका पहाड र तराईका खाद्य वस्तुमा आधारित खाद्यवस्तु रहेका छन् । मीठो छ फुड प्रा.लि.की सविता शाह फिनी, सेलरोटी, खुर्मा लगायतका खाद्य वस्तुमा ग्राहकको आकर्षण भइरहेको बताउँछिन् । उनको पसलमा दैनिक चार हजार रुपैयाँ बराबरको बिक्री भइरहेको उनी बताउँछिन् ।

नमुना च्याउ फर्म कोहलपुरकी पद्मकली बम फापर, कोदो, मार्सी चामल, चिनो, सिमी, सिस्नोको बिक्री बढिरहेको बताउँछिन् । उनको पसलमा ओखर, टिमूर, जिम्मु, च्याउ, सिन्की लगायतका उत्पादन पनि रहेका छन् । हुम्लाको चंखेलीको घट्टेखोला मौरीपालन व्यवसायिक फर्मका हरिलाल बुढाले पनि सिमी, कोदो, चिनो, हाडे ओखर, भीर मौरीको मह बिक्रीमा राखेका छन् । बर्दियाको मधुवन ८ को सृजनशील दालमोठ तथा चिप्स उद्योगकी वसन्ती जोशी स्थानीय आलुबाट बनेको चिप्सको माग बढी रहेको बताउँछिन् । उनको पसलमा चिप्स, दालमोठ, कुरकुरे, चना, केराउका उत्पादन स्टलमा राखिएका छन् ।

रोजिना किराना तथा तरकारी पसलकी रुपनी आचार्यको पसलमा पनि जुम्ला, कालिकोट र बर्दियाका अर्गानिक खाद्य वस्तु स्टलमा राखिएका छन् । कोदो र फापरको पिठोमा बढी आकर्षण रहेको उनी बताउँछिन् । नेपालगञ्ज-२ बागेश्वरी टोलको आन्टीको अचार स्टलमा बयरको अचार, अकबरेको अचार, आँपको अचार, लप्सीको अचार, टिमुरको चटनी, सिद्रा, चिकन र बफ अचारहरु राखिएका छन् ।

महोत्सवका तथ्याङ्क व्यवस्थापन समितिका संयोजक युवराज ढकालका अनुसार महोत्सवमा दैनिक चौध/पन्ध्र हजार रुपैयाँको हाराहारीमा बिक्री भइरहेको छ । संयोजक ढकाल पनि अर्गानिक खाद्यवस्तुका स्टलमा बढी बिक्री भइरहेको बताउँछन् । संघका प्रथम उपाध्यक्ष तथा प्रादेशिक महोत्सवका स्टल बुकिङ समितिका संयोजक चिरञ्जीवी ओलीका अनुसार लुम्बिनी, कर्णाली र सुदूरपश्चिमका विभिन्न जिल्लाका खाद्य वस्तुका स्टलमा अर्गानिक खाद्यवस्तु किन्नेको घुँइचो छ । महोत्सवमा लुम्बिनी, कर्णाली र सुदूरपश्चिम प्रदेशका विभिन्न खाद्य वस्तु लगायतका ३०० बढी स्टलहरु छन् ।

प्रकाशित मिति: मंगलबार, माघ १५, २०८१ २१:४१