प्रहरीमा डीआईजी बन्न अनिवार्य स्टाफ कलेज, इन्स्पेक्टर भर्नाको उमेर २७ वर्षसम्म

सुरक्षा-अपराध

गृहपृष्ठ
सुरक्षा-अपराध
प्रहरीमा डीआईजी बन्न अनिवार्य स्टाफ कलेज, इन्स्पेक्टर भर्नाको उमेर २७ वर्षसम्म

प्रहरीमा डीआईजी बन्न अनिवार्य स्टाफ कलेज, इन्स्पेक्टर भर्नाको उमेर २७ वर्षसम्म

बिहीबार, माघ १७, २०८१ बागेश्वरी पोस्ट

नेपालगन्ज । अबदेखि नेपाल प्रहरीको नायब महानिरीक्षक (डीआईजी) बन्न र प्रहरी निरीक्षक (इन्स्पेक्टर) मा भर्ना हुन नेपाल प्रहरीको संशोधन तथा एकीकरण गर्न बनेको विधेयकले छुट्टै व्यवस्था गरेको छ ।

प्रहरीतर्फ डीआईजी बन्न पुलिस लिडरसिप एण्ड स्टाफ कोर्ष गर्नुपर्ने नियम अनिवार्य लागू गरेको हो । संसदमा दर्ता भएको प्रहरीसम्बन्धि कानुनलाई परिमार्जित गर्दै बनेको विधेयकले प्रहरी इतिहासमै पहिलोपटक यस्तो व्यवस्था गरिएको हो ।

अबदेखि इन्स्पेक्टर र माथिल्लो दर्जामा कार्यरत दर्जाका प्रहरी अधिकृतको नेतृत्व बिकास गर्न नेपाल प्रहरीमा पनि स्टाफ कलेजको व्यवस्था गरिएको छ भने २०८० चैत पहिलो हप्तासम्म र त्यो भन्दा पछि प्रहरी अधिकृतमा खुला भर्ना भएकाहरुले स्टाफ कलेज गर्नैपर्ने भएको हो ।

स्टाफ कलेज नगर्ने प्रहरी अधिकृत वरिष्ठ उपरीक्षक (एसएसपी) भन्दा माथिल्लो तहमा पुग्नबाट बन्चित हुने प्रावधान छ । नेपाली सेना र सशस्त्र प्रहरीमा पहिलादेखि नै स्टाफ कलेज रहदै आएको छ ।

त्यस्तै इन्स्पेक्टरमा भर्ना हुन यस अघि २५ वर्षसम्म रहेकोमा अबदेखि २७ वर्षसम्म आवेदन दिन सकिने व्यवस्थाको प्रस्ताव गरिएको छ । नयाँ विधेयकमा खुला प्रतियोगिताबाट पूर्ति हुने इन्स्पेक्टर पदमा २१ वर्ष पूरा भई २७ वर्ष ननाघेकाले आवेदन दिन सक्ने व्यवस्था गरिएको हो ।

इन्स्पेक्टर भर्नाका लागि यस अघि स्नातक तहको अध्ययन तीन वर्ष रहेकोमा अब स्नातक तहको कार्यक्रम ४ वर्ष पुगिसकेको हुँदा इन्स्पेक्टर भर्नाका लागि २१ वर्ष पूरा भएर २७ वर्षसम्मको उमेर हद राखिएको हो ।

त्यसैगरी, प्रहरी सहायक निरीक्षक (असई) मा भर्ना हुन १८ वर्ष पूरा भएर २५ वर्ष पार नभएको हुनुपर्ने र प्रहरी जवानतर्फ १८ वर्ष पूरा भएर २३ वर्ष ननाघेको हुनुपर्ने बताइएको छ ।

प्रकाशित मिति: बिहीबार, माघ १७, २०८१ १०:३६

प्रतिक्रिया दिनुहोस्