जानकीमा 'एचपीभी' खोप लगाउन सुरु, १५ सय ६५ लाई खोप

स्वास्थ्य

गृहपृष्ठ
स्वास्थ्य
जानकीमा 'एचपीभी' खोप लगाउन सुरु, १५ सय ६५ लाई खोप

जानकीमा 'एचपीभी' खोप लगाउन सुरु, १५ सय ६५ लाई खोप

मंगलबार, माघ २२, २०८१ बागेश्वरी पोस्ट

जानकी (बाँके) । जानकी गाउँपालिकाका १५ सय ६५ जना किशोरीलाई आजदेखि पाठेघरको मुखको क्यान्सर विरुद्धको 'एचपीभी' खोप लगाउन शुरु गरिएको छ । गाउँपालिकाका स्वास्थ्य शाखा प्रमुख दल बहादुर रानाका अनुसार माघ २२ गतेदेखि २९ गतेसम्म जानकी गाउँपालिकाका ६ वटा वडाका १५ सय ६५ जना किशोरीलाई एचपीभी खोप दिन लागिएको हो ।

गाउँपालिकाका विद्यालयमा अध्ययनरत ११ सय ५० र विद्यालय बाहिर रहेका ८ सय १५ जना किशोरीलाई खोप लगाउन लागिएको रानाले जानकारी दिए । विद्यालय, स्वास्थ्य संस्था र समुदायस्तरमा खोप केन्द्र राखी एचपीभी खोप लगाइने रानाले जानकारी दिए ।

पाठेघरको मुखको क्यान्सरबाट जोगाउन खोप प्रभावकारी भएकाले अभियानलाई सफल बनाउनुपर्ने गाउँपालिका अध्यक्ष छब्बन खाँले बताए । गाउँपालिका अध्यक्ष खाँले उमेर पुगेका लक्षित बालिकाहरुलाई खोप लगाएर पाठेघरको क्यान्सर हुने जोखिमबाट जोगिन आग्रह समेत गरे ।जानकी-१ शिवपुरी विद्यालयमा अध्ययनरत स्मृति परियार र शाहिद खान आफूहरु जस्तो किशोरीका लागि खोप अत्यन्तै लाभदायक भएको बताउँछन् ।

खोप कार्यक्रममा गाउँपालिकाका प्रमुख प्रशासकीय अधिकृत नर बहादुर विक, सामाजिक विकास समितिका संयोजक राम आचल धोवी, स्वास्थ्य शाखा प्रमुख दल बहादुर राना, स्वास्थ्यकर्मी, कर्मचारी लगायतको उपस्थिति रहेको थियो । कक्षा ६ देखि १० सम्म अध्ययनरत तथा विद्यालयबाहिर रहेका १० वर्षदेखि १४ वर्ष उमेर समूहका बालिका तथा किशोरीलाई खोप लगाइनेछ ।

प्रकाशित मिति: मंगलबार, माघ २२, २०८१ १५:५४

प्रतिक्रिया दिनुहोस्