नेपालगञ्ज-१ मा मृतक मजदुरका परिवारलाई बिमितको मृत्यु दाबी भुक्तानी हस्तान्तरण

स्थानीय

गृहपृष्ठ
स्थानीय
नेपालगञ्ज-१ मा मृतक मजदुरका परिवारलाई बिमितको मृत्यु दाबी भुक्तानी हस्तान्तरण

नेपालगञ्ज-१ मा मृतक मजदुरका परिवारलाई बिमितको मृत्यु दाबी भुक्तानी हस्तान्तरण

बुधबार, माघ २३, २०८१ बागेश्वरी पोस्ट

नेपालगञ्ज । लघु जीवन बीमा गरेका दुई जना मजदुरको परिवारलाई बिमितको मृत्यु दाबी भुक्तानी हस्तान्तरण गरिएको छ । नेपालगञ्ज उपमहानगरपालिका वडा नम्बर १ ले लघु जीवन बीमा गरेर मृत्यु भएका मुन्नी पासी र हनुमान बर्माको परिवारलाई मृत्यु दाबी भुक्तानी हन्तान्तरण गरेको हो ।

नगर प्रमुख प्रशान्त विष्टले मुन्नी पासीका दाई बुधराम पासी र हनुमान बर्माकी छोरी निकिता बर्मालाई जनही १ लाख २५ हजार रुपैयाँको चेक हस्तान्तरण गरेका हुन् । वडा नम्बर १ ले गार्डियन माइक्रो लाइफ इन्स्योरेन्स लिमिटेडसंग सम्झौता गरेर वडाका ३११ मजदुरको १ लाख ५७ हजारको बीमा गरिदिएको छ । यसमा प्रति ब्यक्ति औषतमा ५०० रुपैयाँ पर्दछ ।नगर प्रमुख विष्टले न्यून आयस्तर भएका श्रमिकहरुको बीमा गरेर वडा नम्बर १ ले राम्रो कामको प्रारम्भ गरेको बताए । उनले नेपालगञ्ज उपमहानगरपालिका पनि श्रमिकको बीमा गर्ने तयारीमा रहेको बताए ।

वडा अध्यक्ष प्रमोद रिजालका अनुसार अति विपन्न मजदुर बर्गलाई आर्थिक सुरक्षाको आधार निर्माण गरिदिने उद्देश्यले बीमा गरेको बताए । गार्डियन माइक्रो लाइफ इन्स्योरेन्स लिमिटेडका प्रबन्धक कैलाश देवकोटाले अति विपन्न र सीमान्तकृत बर्गलाई बीमामा जोड्न आवश्यक रहेको बताउँदै यसबारे सचेतना जागृत गर्नुपर्ने बताए । वडा अध्यक्ष रिजालका अनुसार वडा नम्बर १ कै भीम गुरुङले पनि दुर्घटना बीमा अन्तर्गत १० हजार उपचार खर्च पाएका थिए । नेपालगञ्ज उपमहानगरपालिका र अन्य विभिन्न वडाहरुले पनि लघु जीवन बीमा गर्ने तयारी गरेको प्रबन्धक देवकोटाले बताए ।

त्यसै कार्यक्रमका बीच वडा नम्बर १ ले आजै धम्बोझी माध्यमिक विद्यालयमा अध्ययनरत कक्षा १ देखि ५ सम्मका बालबालिकालाई पोशाक (ट्र्याकसुट) पनि वितरण गरेको छ । यस्तै वडामा क्रियाशील विभिन्न संघसंस्था, क्लब र समितिहरुलाई सामग्री पनि वितरण गरिएको छ । त्यस अवसरमा बाँकेका प्रमुख जिल्ला अधिकारी खगेन्द्र प्रसाद रिजाल, नेपालगञ्ज उपमहानगरपालिकाका प्रमुख प्रशासकीय अधिकृत ओम बहादुर खड्का, एमाले बाँकेका अध्यक्ष निरक गुरुङ, नेपालगञ्ज उपमहानगरपालिका शिक्षा महाशाखा प्रमुख गोर्ख बहादुर थापा लगायतको उपस्थिति थियो ।

प्रकाशित मिति: बुधबार, माघ २३, २०८१ २०:४५

प्रतिक्रिया दिनुहोस्