बालिका शिक्षा कार्यक्रमले सही मार्ग देखाएको अलुम्नाईको भनाई

स्थानीय

गृहपृष्ठ
स्थानीय
बालिका शिक्षा कार्यक्रमले सही मार्ग देखाएको अलुम्नाईको भनाई

बालिका शिक्षा कार्यक्रमले सही मार्ग देखाएको अलुम्नाईको भनाई

शुक्रबार, फागुन १६, २०८१ बागेश्वरी पोस्ट

नेपालगञ्ज । जीवन उपयोगी सीपले जीवनलाई सही मार्गमा लैजान सहज बनाएको बाँकेको कोलहपुरमा सम्पन्न अलुम्नाई मिटअपका सहभागीहरुले बताएका छन् । बालिका शिक्षा कार्यक्रम अन्तरगत कक्षा १२ पास गरेका बालिका (अलुम्नाई) हरुको सहभागितामा आज सम्पन्न कार्यक्रमका सहभागी अलुम्नाईहरुले बालिका शिक्षा कार्यक्रममा जोडिन पाएकोमा खुसी ब्यक्त गर्दै कक्षा १२ सम्म सिकेको ज्ञान उपयोगी भएको बताएका हुन् ।

अलुम्नाई बालिकाहरुको प्रगतिका बारेमा जानकारी लिने, सफलताका कथा तथा अनुभव आदानप्रदान गर्ने र अलुम्नाईसँगको सम्बन्धलाई बढावा दिने उद्देश्यले अल्मुनाई मिटअप गरिएको थियो । रुम टु रिडको आर्थिक तथा प्राविधिक सहयोगमा बास नेपालद्वारा गरिएको कार्यक्रममा बोल्दै बास नेपालका निवर्तमान अध्यक्ष तथा तालिम विभाग प्रमुख रमेश सिटौलाले सहभागीहरुको आत्मविश्वास देख्दा खुसी लागेको बताए । उनले सामाजिक विभेदबिरुद्ध अगुवाको रुपमा कार्य गर्न अनुरोध गरे । बास नेपालका सिनियर सामाजिक परिचालक शोभा भण्डारीले सहजीकरण गरेको कार्यक्रममा जीवन उपयोगी सीपका बिषयमा परियोजना संयोजक हेमराज भट्टले प्रस्तुतिकरण गरेका थिए ।

कार्यक्रमका सहभागी अलुम्नाई गिता परियार, सिता बिक, अन्जली शर्मा, कविता अधिकारी, अनिता चन्द, सुशिला मुराउ, समिक्षा सार्की, रबिना थारु लगायतले आफ्नो अनुभव आदानप्रदान गरेका थिए । कार्यक्रममा अल्मुनाइको सफलताको कथा, अनुभव आदानप्रदानसँगै उनीहरुको क्षमता उजागर गर्न ट्यालेन्ट शो समेत गरिएको थियो । कार्यक्रममा बासका निवर्तमान अध्यक्ष सिटौला, परियोजना संयोजक हेमराज भट्ट, लेखा अधिकृत हंस शाही, सिनियर सामाजिक परिचालकहरु शोभा भण्डारी, रचना चौधरी, सबिता सुनार, सुस्मिता लामा र लेखा सहायक प्रदिप बोहराको उपस्थिति रहेको थियो । कार्यक्रममा ३९ जना अलुम्नाईको सहभागिता रहेको थियो ।

प्रकाशित मिति: शुक्रबार, फागुन १६, २०८१ २१:१५