सहकारीको वित्तीय जोखिम विश्लेषण गर्न पल्स तालिम

अर्थ

गृहपृष्ठ
अर्थ
सहकारीको वित्तीय जोखिम विश्लेषण गर्न पल्स तालिम

सहकारीको वित्तीय जोखिम विश्लेषण गर्न पल्स तालिम

मंगलबार, फागुन २७, २०८१ बागेश्वरी पोस्ट

नेपालगञ्ज । नेपालगञ्ज उपमहानगरपालिकाले सहकारी संस्थाहरुको वित्तीय जोखिम अवस्था विश्लेषण गर्न पल्स तालिम सञ्चालन गरेको छ । पहिलो पटक आयोजना गरिएको दुई दिने पल्स तालिममा आफ्नो संस्थाको वित्तीय परीक्षण आफैं गर्न सकिने प्रणालीबारे सिकाइएको छ । "पल्सद्वारा सहकारी संस्थाको वित्तीय विश्लेषण गरिन्छ, यसले जोखिम अवस्था पत्ता लगाउँछ," सहकारी शाखा प्रमुख प्रविण कुमार रानाले भने-"१४ वटा आधारभूत इण्डिकेटरद्वारा कमजोरी पत्ता लगाएर कहाँ सुधार गर्दै लैजाने भन्ने थाहा हुन्छ । जसले सहकारी संस्थालाई आफ्नो वित्तीय स्वस्थताबारे जानकारी दिन्छ, कुन पार्टलाई म्यानेज गर्ने भन्ने निक्र्यौल निस्किन्छ ।"

४० वटा सहकारी संस्थाका प्रतिनिधि सहभागी भएको पल्स तालिममा वित्तीय सुरक्षा, प्रभावकारी वित्तीय संरचना, सम्पत्तिको गुणस्तर, तरलताको अनुपात र बृद्धिको संकेतबारे सिकाइएको प्रशिक्षक नेप्स्कुन फिल्ड कार्यालय बाँकेका प्रमुख छत्र प्रसाद धमलाले बताए । "यसले संस्थाको वित्तीय अनुशासन, सुशासन, संंस्थाको स्तर मापन गर्न मद्दत गर्दछ," धमलाले भने-"यो वित्तीय स्वस्थता मापन गर्ने प्रणाली हो ।" सहकारी शाखा प्रमुख रानाले यस तालिममार्फत सहकारीहरुको वित्तीय जोखिम अवस्था पत्ता लगाएर त्यसकै आधारमा संस्थाको स्तर बर्गीकरण गरिने बताए ।

तालिममा धमलासंगै जिल्ला सहकारी संघका प्रबन्ध सञ्चालक नवराज उपाध्यायले प्रशिक्षण दिएका थिए । तालिमको समापन गर्दै आर्थिक विकास समिति संयोजक गोपाल पुनले पल्स तालिममार्फत आफ्नो संस्थाको वित्तीय जोखिम पहिचान गरी सुधार गर्न सहज हुने बताए । सहकारीहरुले जनविश्वास जागृत गर्न वित्तीय अनुशासनमा ध्यान दिनुपर्ने पुनको भनाई छ ।

प्रकाशित मिति: मंगलबार, फागुन २७, २०८१ २०:१४

प्रतिक्रिया दिनुहोस्