कोहलपुरको हवल्दारपुरमा नमुना बस्ती निर्माण सुरु

स्थानीय

गृहपृष्ठ
स्थानीय
कोहलपुरको हवल्दारपुरमा नमुना बस्ती निर्माण सुरु

कोहलपुरको हवल्दारपुरमा नमुना बस्ती निर्माण सुरु

बुधबार, फागुन २८, २०८१ बागेश्वरी पोस्ट

नेपालगन्ज । बाँकेको कोहलपुर नगरपालिका वडा नं. १४ हवल्दारपुरमा रहेका अति विपन्न चिडिमार तथा खटिक परिवारले अब पक्की घर पाउने भएका छन् । कोहलपुर नगरपालिकाको विशेष पहलमा छिमेक सेवा समाज संस्थाले अति विपन्न चिडिमार तथा खटिक समुदायलाई घर बनाइदिने भएपछि बर्षौंदेखि छाप्रोमा सकसपूर्ण जीवन विताइरहेका उनीहरु पक्की घरमा वस्न पाउने भएका हुन् ।

नमुना वस्ती निर्माण कार्यक्रम अन्तर्गत पहिलो चरणमा ८ वटा घर निर्माण प्रारम्भ भएको छ । आज कोहलपुर नगरपालिकाका प्रमुख पुर्ण प्रसाद आचार्यले मोलहे खटिकको घरको शिलान्यास गर्दै नमुना बस्ती निर्माण कार्यक्रमको सुभारम्भ गरेका छन् । उनले गरीव विपन्न परिवारहरुको जीवनस्तर माथि उठाउने स्थानीय सरकारको कर्तव्य भएकाले त्यही अनुसार नमुना वस्ती निर्माण कार्यक्रम सुरु गरिएको बताए ।

‘छिमेक सेवा समाजले अन्य ठाउँमा पनि अति विपन्न तथा गरीव समुदायका लागि नमुना वस्ती निर्माण कार्यक्रम अन्तरगत आवास बनाउने गरेको रहेछ, उनले भने–‘हामीले प्रस्ताव गर्‍यौं । उहाँहरु तयार हुनुभयो । र, पहिलो चरणमा ८ वटा घरहरु निर्माण प्रारम्भ भएको छ ।’ हवल्दारपुरमा करीव २५/३० घरपरिवार चिडिमार र खटिक समुदायको बसोबास रहेको नगर प्रवक्ता समेत रहेका वडा अध्यक्ष नम बहादुर आलेले बताए ।

सामाजिक अभियन्ता एलबी कार्कीले असार मसान्तसम्म निर्माण सम्पन्न गर्ने गरी घर निर्माणको काम सुरु गरिएको बताए । संस्थाले दुई कोठे पक्की घर बनाइदिनेछ । बर्षौंदेखि झुप्रोमा बस्दै आएका उनीहरु पक्की घर पाउने भएपछि खुसी भएका छन् । गर्मीयाममा जसोतसो दिन-रात कटे पनि बर्षायाम र चिसोयाममा सकसपूर्ण अवस्था व्यहोर्नु परेको मोलहे खटिकले दु:खेसो सुनाए । ‘तीन पुस्तादेखि हामीले यस्तै समस्या खेप्दै आएका हौं । ‘नगर प्रमुख आफैंले आएर घरको शिलान्यास गरिदिएपछि पक्की घरमा वस्ने सपना पूरा हुने भयो,' उनले खुशी हुँदै भने–‘हाम्रो लागि रोजगारीको पनि व्यवस्था गरिदिनुपर्‍यो ।’

पहिलो चरणमा मोलहे खटिक, जोखन खटिक, मनोहर चिडिमार, राधे चिडिमार, ओम प्रकाश चिडिमार, माताप्रसाद कुर्मी लगायतको घर निर्माण गरिनेछ । नगर प्रमुख आचार्यले विस्तारै अन्य घरहरु समेत बन्ने बताए ।

प्रकाशित मिति: बुधबार, फागुन २८, २०८१ १३:०३