प्रधानमन्त्री रोजगार कार्यक्रमले लिलालाई दिएको खुसी

स्थानीय

गृहपृष्ठ
स्थानीय
प्रधानमन्त्री रोजगार कार्यक्रमले लिलालाई दिएको खुसी

प्रधानमन्त्री रोजगार कार्यक्रमले लिलालाई दिएको खुसी

बिहीबार, चैत ७, २०८१ बागेश्वरी पोस्ट

कोहलपुर । लिला गौतमलाई खुसीको कुनै सीमा छैन । छोरा अर्जुनले प्रहरी नायव निरीक्षक (असई) मा नाम निकालेपछि उनलाई अब दुःखका दिन सकिए झै लागेको छ । ‘जीवनको सबैभन्दा खुसी मिलेको दिन हो मेरो,' उनले भनिन्–‘अब कान्छो छोरा तुल्सीरामलाई कसरी पढाउने चिन्ता पनि छैन । दाइले हेरिहाल्छ अब ।’

कोहलपुर नगरपालिका वडा नम्बर ५ शान्तिनगरकी ३९ वर्षीया लिलाले छोरालाई यहाँसम्म पुर्याउन गरेका दुःख कम छैनन् । र, छोराले आमाको दुःखलाई सुखको अनुभूति दिलाए । सरकारी जागिर गरौं पढाई छैन । ज्याला मजदुरी गरौं भनेको बेला नपाइने । उनी कामको खोजीमा भौंतारिरहेकी थिइन् । किनकी त्यतिबेला काम पाइने अवस्थै थिएन् । कोरोना महामारीले मुलुक लकडाउनमा थियो । प्रधानमन्त्री रोजगार कार्यक्रम अन्तर्गत कोहलपुर नगरपालिकाले बेराजगारहरुलाई काम दिन लागेको कुरा उनले सुनिन् । आवेदन दिइन् । र, सय दिन काम पाइन् । त्यही रकमबाट उनले छोरालाई असईको तयारी गर्न काठमाडौं पठाइन् ।

छोरा अर्जुनले पनि आमाको सपनालाई पूरा गरिदिए । असईमा नाम निकालिदिए । ‘सायद कोहलपुर नगरपालिकाले एक सय दिन बराबरको रोजगारी नदिएको भए मैले छोरालाई पढाउन सक्नेथिनँ,' उनले भनिन्–‘कहिलेकाहीँ थोरै रकमले पनि अतुलनीय मूल्य बराबरको खुसी दिँदो रहेछ ।’ श्रीमान खगेन्द्र प्रसाद गौतम नेपाल प्रहरीबाट सेवा निवृत्त भए । उनी कतारमा छन् । उतै दुर्घटनामा परे । ज्यान त जोगियो । तर, सोचे जस्तो कमाई गर्न सकिरहेका छैनन् ।

घरपरिवार चलाउने, दुई छोरालाई पढाउने सबै जिम्मेवारी लिलाको काँधमा छ । घर बनाउन लिएको ऋणको भारीले उनलाई धेरै समय थिच्यो । आयस्रोत आउने ठाउँ कतै नभएको बेला निश्चित समयको रोजगारीले पनि ठूलो उपलब्धि मिलेको लिला बताउँछिन् । उनी अहिले पनि प्रधानमन्त्री रोजगार कार्यक्रममा सहभागी भएकी छिन् । उनी जस्ता सयौं बेरोजगारहरुले प्रधानमन्त्री रोजगार कार्यक्रमबाट राहात पाएको बताउँछन् ।

प्रधानमन्त्री रोजगार कार्यक्रम अन्तर्गत कोहलपुर नगरपालिकामा सञ्चालित श्रममा आधारित योजना प्रभावकारी हुँदा त्यसको लाभ लिनेहरु खुसी भएका छन् । चालू आर्थिक वर्ष २०८१/८२ मा हाल कोहलपुर नगरपालिकामा १७ वटा श्रममा आधारित योजनाहरु सञ्चालनमा रहेको रोेजगार संयोजक आशिष बर्मा बताउँछन् । जसमा नेपाल सरकार र युवा रोजगारीको लागि रुपान्तरण पहल (आइडिए) को श्रोतबाट योजनाहरु सञ्चालन भइरहेका छन् ।

कुल ३७५ जना सुचीकृत बेरोजगार व्यक्तिहरु मध्ये यस वर्ष आइडिएमा ४० जना र नेपाल सरकारको श्रोतबाट ७० जना गरी जम्मा ११० जनाले रोजगारी प्राप्त गरिरहेको संयोजक वर्माले बताए । उनीहरुले एक सय दिन बराबरको ज्यालादारी काम प्राप्त गर्छन् । आइडिएको श्रोतबाट ४० जना सुचीकृत बेरोजगार व्यक्तिहरुले ५० दिनको सीपमूलक तालिम र ५० दिन बराबरको रोजगारी प्राप्त गर्ने पनि उनले बताए । त्यसका लागि करीब २३ लाख बराबरको बजेट विनियोजन भएको छ ।

प्रकाशित मिति: बिहीबार, चैत ७, २०८१ ०८:५२

प्रतिक्रिया दिनुहोस्