बुलबुलिया शान्तिनगर टोलको नियमित सरसफाई, स्थानीय सहभागितामा जोड

स्थानीय

गृहपृष्ठ
स्थानीय
बुलबुलिया शान्तिनगर टोलको नियमित सरसफाई, स्थानीय सहभागितामा जोड

बुलबुलिया शान्तिनगर टोलको नियमित सरसफाई, स्थानीय सहभागितामा जोड

शनिबार, चैत ९, २०८१ बागेश्वरी पोस्ट

नेपालगञ्ज । नेपागञ्ज वडा नम्बर १३ बुलबुलिया शान्तिनगरका स्थानीयले आज आफ्नो टोलको सरसफाई गरेका छन् ।

टोलको दक्षिण-उत्तरतर्फको ६०० मिटर सडक-नालाको सरसफाई गरिएको समितिका सचिव रामकुमार शर्माले जानकारी दिए । बुलबुलिया शान्तिनगर टोल विकास समितिको आयोजनामा गरिएको टोल सरसफाई कार्यक्रममा जेष्ठ नागरिक, युवा तथा महिलाहरु गरी करीब २० जनाको सहभागिता रहेको थियो ।

टोल सरसफाईका लागि स्थानीयहरुको आर्थिक सहयोगमा सफाई सम्बन्धि सामग्री समितिमार्फत खरिद गरिएको छ । समितिले प्रत्येक साताको शनिवार बिहान ६.३० बजेदेखि टोल क्षेत्रको स्थान छनोट गरी सरसफाई गर्ने कार्यक्रम तय गरिएको सचिव शर्माले बताए ।

टोल सरसफाईका अलावा सुरक्षाका दृष्टिकोणले सम्वेदनशील स्थानमा सीसी क्यामरा जडान, टोलका पाटीपौवा तथा सार्वजनिक स्थलको संरक्षण तथा सम्बद्र्धन र टोल क्षेत्रमा जथाभावी फोहर गर्ने प्रवृत्तिको अन्त्यका लागि पहिलो चरणमा सचेतीकरण अभियान सञ्चालनको प्रक्रिया पनि समितिले शुरु गरिसकेको छ ।

सीसी क्यामरा जडान तथा सरसफाई उपकरण खरिदका लागि समितिले माग गरे बमोजिम नेपालगञ्ज उपमहानगरपालिका वडा नम्बर १३ को कार्यालयले रु. ५० हजार बजेट बिनियोजन गरिसकेको र सो बजेट छिट्टै समितिलाई निकासा गरिने वडा अध्यक्ष सुरेश सिंह ठाकुरले जानकारी दिए ।

यसैबीच टोल विकास समितिको आजै बसेको बैठकले टोलको दक्षिण-उत्तर क्षेत्रको विद्युत पोल सडक छेउँको उपयुक्त स्थानमा स्थानान्तरण गर्न प्राविधिक पक्ष र आर्थिक पक्षमा तत्काल काम गर्ने निर्णय गरेको छ ।

समितिका अध्यक्ष निरज कुमार गौतमको अध्यक्षतामा बसेको बैठकले टोल विकासका विविध पक्षमाथि गम्भीर छलफल गरी विकास गतिविधिमा स्थानीयहरुको बढी भन्दा बढी सहभागिता जुटाउनुपर्नेमा समेत सहमति कायम गरेको जनाइएको छ ।

प्रकाशित मिति: शनिबार, चैत ९, २०८१ २१:१८