विश्व पानी दिवसको अवसरमा नेपालगञ्जमा पानीको चर्चा

स्थानीय

गृहपृष्ठ
स्थानीय
विश्व पानी दिवसको अवसरमा नेपालगञ्जमा पानीको चर्चा

विश्व पानी दिवसको अवसरमा नेपालगञ्जमा पानीको चर्चा

शनिबार, चैत ९, २०८१ बागेश्वरी पोस्ट

नेपालगञ्ज । विश्व पानी दिवसको अवसरमा नेपालगञ्जमा अन्तरक्रिया कार्यक्रम गरिएको छ । शाश्वत आचार्य स्मृति प्रतिष्ठान नेपालगञ्जको आयोजनामा गरिएको अन्तरक्रिया कार्यक्रममा पानी विज्ञ रमेश गौतमले पानी, यसको महत्व, चुलिँदै गएको पानी संकट, समाधानका उपायका विषयमा प्रस्तुतिकरण गरेका थिए ।

शाश्वत आचार्य स्मृति प्रतिष्ठानका अध्यक्षता प्रा. डा. जनार्दन आचार्यको अध्यक्षता एवम् लुम्बिनी प्राविधिक विश्वविद्यालयका विज्ञ सदस्य प्रा. डा. कृष्ण प्रसाद घिमिरेको प्रमुख आतिथ्यतामा सम्पन्न कार्यक्रममा पानी र यसको महत्व तथा पानीका स्रोतहरुको संरक्षणमा देखिएको चुनौति र समाधानका उपायमाथि छलफल गरिएको थियो ।

‘हिमनदी संरक्षण’ भन्ने मूल नाराका साथ आज विश्वभर विभिन्न कार्यक्रम गरी पानी दिवस मनाइएको छ । बढ्दो सहरीकरण, औद्योगीकरण, जलवायु परिवर्तन, वर्षाको ढाँचामा आएको परिवर्तन, अत्यधिक पानीको उपयोगसहितका कैयौँ कारकबाट पानी सङ्कट उत्पन्न भइरहेको सन्दर्भमा यस दिवसले महत्त्वपूर्ण शिक्षा दिने विश्वास लिइएको छ ।

पछिल्ला दिनमा जलवायु परिवर्तनका कारण हिमनदी सुक्दै गएको र त्यसले मानव जीवन र समग्र प्रकृतिमाथि ठूलो चुनौती थपिरहेको भन्ने आत्मबोधका साथ यस पटक पानी दिवसको मूल नारा नै हिमनदीको संरक्षण राखिएको छ ।

सन् १९९३ यता हरेक वर्ष २२ मार्चमा मनाइने यो दिवस सुरक्षित तथा स्वच्छ पानीको महत्वमा केन्द्रित संयुक्त राष्ट्रसङ्घको विश्वव्यापी पहल हो । सुरक्षित र स्वच्छ पानी व्यवस्थापनका लागि आवश्यक रणनीतिसहितको कदम चाल्न र यसबारे जनचेतना अभिवृद्धि गर्न यो दिवसले सहयोग गर्दै आएको छ ।

संसारभर कुल ९७ दशमलव पाँच प्रतिशत पानी समुद्रको रहेको छ । त्यो पानी नूनिलो भएकाले पिउन, सिँचाइ र विद्युत् उत्पादनको लागिसमेत प्रयोग गर्न मिल्दैन । पानीको सदुपयोग गर्न नसक्दा संसारभर नै समस्या बढ्दै गएको छ । अन्तरराष्ट्रिय पानी व्यवस्थापन संस्थाका अनुसार प्रत्येक वर्ष एक जनाका लागि नौ हजार घनमिटर पानीको आवश्यकता पर्छ ।

संसारभर उपलब्ध पानीमध्ये २।५ प्रतिशतमात्र पिउनयोग्य उपलब्ध छ । मूल, खोला, नदी, हिमनदीबाट उपलब्ध हुने पानी नै मानवीय प्रयोगका लागि उपयुक्त छ । पृथ्वीको उत्तरी तथा दक्षिणी ध्रुवमा उपलब्ध हुने पानी मानवीय उपभोगका लागि योग्य मानिएको छ ।

प्रकाशित मिति: शनिबार, चैत ९, २०८१ २१:३८