नरैनापुरमा आगलागी हुँदा डेढ दर्जन घरगोठ जलेर नष्ट

स्थानीय

गृहपृष्ठ
स्थानीय
नरैनापुरमा आगलागी हुँदा डेढ दर्जन घरगोठ जलेर नष्ट

नरैनापुरमा आगलागी हुँदा डेढ दर्जन घरगोठ जलेर नष्ट

मंगलबार, चैत १२, २०८१ बागेश्वरी पोस्ट

नेपालगञ्ज । बाँकेको नरैनापुर गाउँपालिकामा आगलागी हुँदा डेढ दर्जन घरगोठ जलेर नष्ट भएका छन् । नरैनापुर गाउँपालिका ४ जयरामपुर्वामा आज दिउँसो ३ बजेबाट सुरु भएको आगलागीबाट १७ बढी घरगोठ जलेर नष्ट भएको नरैनापुर गाउँपालिकाले जानकारी दिएको छ ।

दिउँसो जुमाई खाँको घरबाट लागेको आगो नेपालगञ्ज उपमहानगरपालिकाको दमकल, नेपाल प्रहरी, सशस्त्र प्रहरी र स्थानीय बासिन्दाले नियन्त्रणमा लिएका थिए । खरले छाएका र एक आपसमा जोडिएका घरगोठ तथा तीव्र हावाहुरीले आगो नियन्त्रणमा लिन निकै हम्मेहम्मे परेको गाउँपालिका अध्यक्ष इस्तियाक अहमद शाहले बताए । आगलागीका कारण २५ लाख भन्दा बढीको क्षति भएको प्रारम्भिक अनुमान गरिएको छ ।

नरैनापुर गाँउपालिका अध्यक्ष शाह, प्रमुख प्रशासकीय अधिकृत नवराज वली, वडा नम्बर ४ का अध्यक्ष मनोज शर्मा, जिन्सी शाखा प्रमुख लक्ष्मीकान्त मिश्रा र विपत शाखा प्रमुख भरत महतो सहितको टोलीले घटनास्थलमा पुगेर आगलागी पीडितलाई राहत दिने प्रतिबद्धता गरेको छ।

विभिन्न निकायसँगको समन्वयमा आज रातिको लागि पाल र खानाको व्यवस्था गरिएको र जिल्ला विपद् व्यवस्थापन समितिलाई थप राहतको व्यवस्था गर्न माग गरिएको अध्यक्ष शाहले बताए ।

प्रकाशित मिति: मंगलबार, चैत १२, २०८१ २०:१६

प्रतिक्रिया दिनुहोस्