नेपालगञ्जमा भोलिदेखि दुई दिने रोजगार मेला आयोजना हुँदै

अर्थ

गृहपृष्ठ
अर्थ
नेपालगञ्जमा भोलिदेखि दुई दिने रोजगार मेला आयोजना हुँदै

नेपालगञ्जमा भोलिदेखि दुई दिने रोजगार मेला आयोजना हुँदै

बिहीबार, चैत १४, २०८१ बागेश्वरी पोस्ट

नेपालगञ्ज । नेपालगञ्जमा भोलिदेखि दुई दिने रोजगार मेला आयोजना हुँदैछ । नेपालगञ्ज उद्योग बाणिज्य संघको आयोजना तथा बाँकेका स्थानीय पालिकाहरुसंगको सहकार्य र साझेदारीमा चैत १५ र १६ गते दुई दिने रोजगार मेला गर्न लागिएको हो ।

नेपालगञ्जमा आज पत्रकार सम्मेलनको आयोजना गरेर रोजगार मेलाको तयारी पूरा भएको जानकारी दिइएको छ । नेपालगञ्ज उद्योग बाणिज्य संघका अध्यक्ष टंक बहादुर धामीले रोजगार मेलामा नेपालगञ्ज उपमहानगरपालिका, कोहलपुर नगरपालिका, खजुरा गाउँपालिका, जानकी गाउँपालिका, बैजनाथ गाउँपालिका, नरैनापुर गाउँपालिका र राप्तीसोनारी गाउँपालिकासंग सहकार्य र साझेदारी रहेको बताए । रोजगारदाता र बेरोजगार ब्यक्तिहरुलाई एकै थलोमा राखेर रोजगारी सिर्जना गर्ने, विद्यमान बेराजगारी समस्या समस्या कम गर्ने, विदेश पलायन न्यूनीकरण गर्ने र स्वदेशमै रोजगारीको अवसर सिर्जना गर्ने उद्देश्यले मेलाको आयोजना गरिएको धामीको भनाई छ ।

मेलामा रोजगारदाताका ३५ वटा स्टल रहनेछन् । संघले सबै स्टल निःशुल्क उपलब्ध गराएको बताएको छ । मेलाबाट कम्तीमा १०० जनाले प्रत्यक्ष रोजगार पाउने अनुमान गरिएको छ । "रोजगारदाता र रोजगारको खोजीमा रहेका ब्यक्ति बीच सिधा सम्पर्क हुने भएकोले पनि मेला लगत्तै धेरै रोजगारीका अवसर सिर्जना हुने हामीले आशा गरेका छौं," अध्यक्ष धामीले भने-"रोजगार मेलाले रोजगारदातालाई आवश्यक पर्ने श्रमशक्तिको पहिचान गरेपछि सोही अनुसारको सीपयुक्त जनशक्ति उत्पादनका लागि तालिम आयोजना गरेर रोजगारी सिर्जना गर्ने प्रतिबद्धता पनि जनाउँदछौं ।"

त्यसका लागि स्थानीय सरकार, प्रदेश र संघीय सरकारका साथै रोजगारदातासंग सहकार्य गरिने नेपालगञ्ज उद्योग बाणिज्य संघले जनाएको छ । पत्रकार सम्मेलनमा नेपालगञ्ज उद्योग बाणिज्य संघका प्रथम उपाध्यक्ष चिरञ्जीवि ओली, महासचिव भिम बहादुर रानाभाट लगायत पदाधिकारी र सदस्यहरुको उपस्थिति थियो ।

प्रकाशित मिति: बिहीबार, चैत १४, २०८१ १७:४८

प्रतिक्रिया दिनुहोस्