कोहलपुर नगरपालिकाद्वारा नरैनापुरका अग्नीपीडितलाई जस्तापाता सहयोग

स्थानीय

गृहपृष्ठ
स्थानीय
कोहलपुर नगरपालिकाद्वारा नरैनापुरका अग्नीपीडितलाई जस्तापाता सहयोग

कोहलपुर नगरपालिकाद्वारा नरैनापुरका अग्नीपीडितलाई जस्तापाता सहयोग

शुक्रबार, चैत १५, २०८१ बागेश्वरी पोस्ट

कोहलपुर । कोहलपुर नगरपालिकाले बाँकेको नरैनापुर–४ जयरामपुर्वामा भएको आगलागी पीडितहरुलाई टिनका जस्ता पाता सहयोग गरेको छ । मंगलवार दिउँसो भएको आगलागीमा १७ वटा घर जलेर नष्ट भएका थिए । फुसले छाएका घरहरुमा आगलागी हुँदा करीव ८५ लाख बराबरको नोक्सानी भएको थियो ।

अत्यन्तै विपन्न समुदायका व्यक्तिहरुको बसोबास रहेको जयरामपुर्वामा वडा कार्यालयको आग्रहपछि रंगीन टिनका पाता सहयोग गरिएको कोहलपुर नगरपालिकाका नगर प्रमुख पूर्ण प्रसाद आचार्यले जानकारी दिए । ‘खाद्यान्न लत्ताकपडा सहयोग गरेर मात्रै उनीहरुले वर्षौंदेखि झेल्दै आएको आगलागी समस्या समाधान नहुने देखिएपछि प्रति परिवारलाई १० वटाका दरले जस्तापाता सहयोग गरिएको छ,’ उनले भने ।

कोहलपुर नगरपालिकाका विपद व्यवस्थापन समिति संयोजक पवित्रा थारुको नेतृत्वमा शाखा प्रमुख वीर बहादुर थापा, सदस्य लाल बहादुर राना, कार्यपालिका सदस्य केशरी कुमारी रावतले अग्नीपीडित बस्ती पुगेर शुक्रबार टिनका पाता सहयोग हस्तान्तरण गरेका थिए । त्यसक्रममा नरैनापुर गाउँपालिका वडा नम्बर ४ का वडा अध्यक्ष मनोज शर्मा र वडा नम्बर ५ का वडा अध्यक्ष कृष्णचन्द्र मौर्य लगायतको सहभागिता रहेको थियो ।

टिनका पाता पाएपछि पीडितहरुले कोहलपुर नगरपालिकाप्रति आभार प्रकट गरेको शाखा प्रमुख थापाले बताए । नरैनापुर गाउँपालिकाको दमकल विग्रेका कारण उक्त आगलागी नियन्त्रणका लागि कोहलपुरले दमकल पठाएको थियो । नरैनापुर गाउँपालिकाले बर्सेनी आगलागीका घटनाको सामना गर्नु परेको छ । नरैनापुरमा विपद्को अवस्था विश्लेषण गर्दा बढी क्षति हुने मध्ये बाढी भन्दा पछाडि आगलागी दोस्रो स्थानमा छ ।

प्रकाशित मिति: शुक्रबार, चैत १५, २०८१ २०:३०

प्रतिक्रिया दिनुहोस्