ठाकुरबाबा नगरपालिकाका अगुवा महिलालाई उद्घोषण तालिम

स्थानीय

गृहपृष्ठ
स्थानीय
ठाकुरबाबा नगरपालिकाका अगुवा महिलालाई उद्घोषण तालिम

ठाकुरबाबा नगरपालिकाका अगुवा महिलालाई उद्घोषण तालिम

बुधबार, वैशाख ३, २०८२ बागेश्वरी पोस्ट

बर्दिया । ठाकुरबाबा नगरपालिकाका सामाजिक अगुवा महिलाका लागि पाँच दिने उद्घोषण तालिम सञ्चालन गरिएको छ । घरेलु तथा साना उद्योग कार्यालय बर्दियाको आयोजना तथा नारी एकता शक्ति केन्द्र ठाकुरबाबाको समन्वयमा सामाजिक क्षेत्रमा क्रियाशील २५ महिलाहरुलाई बुधबारदेखि सीप बिकासका लागि सो तालिम आयोजना गरिएको हो ।

तालिमको उद्घाटन गर्दै प्रदेशसभा सदस्य एव् प्रमुख अतिथि मालती सोडारीले महिलाको नेतृत्व बिकाससंगै आयआर्जन तथा ब्यबसाय प्रवर्द्धनका लागि सञ्चार सीप र वाकपटुता अनिवार्य रहेको आवश्यकता औंल्याइन् । सिकेका सीपलाई व्यवहारिकरुपमा कार्यान्वयनमा ल्याउन सहभागीहरुलाई उनले सुझाव दिइन् । जिल्ला समन्वय समिति बर्दियाका प्रमुख सुर्य बहादुर बिष्टले महिलाहरुलाई आत्मबल बढाउने सीप-कलासंगै बजारीकरणको बारेमा पनि जानकारी दिई दक्ष बनाइनुपर्नेमा जोड दिए ।

नेपाल पत्रकार महासंघ लुम्बिनी प्रदेशका अध्यक्ष एवं प्रशिक्षक शुक्रऋषि चौलागाईले सञ्चार सीप र वाक कलाले आत्मबल वृद्धिका साथै नेतृत्व बिकासमा मद्दत पुर्याउने विश्वास व्यक्त गरे । सोही समारोहमा बाटेको धुप बनाउने तीन दिने तालिमको पनि उद्घाटन गरिएको थियो ।

घरेलु तथा साना उद्दोग कार्यालयका उद्यम बिकास सहजकर्ता चिना मगरको सञ्चालन तथा लेखा प्रमुख जगतराम चौधरीको सभापतित्वमा भएको कार्यक्रममा नारी एकता शक्ति केन्द्रका जग्गादातृ अञ्जु भण्डारी, धुप प्रशिक्षक भगवती बस्याल, ठाकुरबाबा नगरपालिका १ का सदस्य सुशीला खड्का लगायतले शुभकामना मन्तव्य व्यक्त गरेका थिए । तालिममा सञ्चार, आमसञ्चार, उद्घोषण, उद्घोषक, वाक कला, कार्यक्रम सञ्चालन लगायतका विविध पाटोमा प्रशिक्षण दिइनेछ ।

प्रकाशित मिति: बुधबार, वैशाख ३, २०८२ १९:४९