सुपरको तीन महिने समीक्षासंगै आगामी योजनाबारे छलफल

स्थानीय

गृहपृष्ठ
स्थानीय
सुपरको तीन महिने समीक्षासंगै आगामी योजनाबारे छलफल

सुपरको तीन महिने समीक्षासंगै आगामी योजनाबारे छलफल

मंगलबार, वैशाख १६, २०८२ बागेश्वरी पोस्ट

नेपालगञ्ज । नेपालगञ्ज उपमहानगरपालिकामा सञ्चालित सहरी विपद् तथा भूकम्पीय पूर्व तयारी परियोजना (सुपर) को त्रैमासिक बैठक आज सम्पन्न भएको छ । बैठकमा सुपरका राजु अधिकारीले सन् २०२५ को जनवरीदेखि मार्चसम्म सम्पन्न गरिएको गतिविधिका बारेमा जानकारी गराउँदै आगामी तीन महिना अर्थात अप्रिलदेखि जुनसम्म गरिने कार्यक्रम तथा योजनाबारे अवगत गराए ।

उनले नेपालगञ्जमा आवासीय बीमा कार्यक्रमको शुभारम्भ, विद्यालय सुरक्षा कार्यक्रम अन्तर्गत कृत्रिम घटना अभ्यास, स्थानीय तहबीच ज्ञान आदानप्रदान, घरेलु आगलागी नियन्त्रण सम्बन्धि कृत्रिम घटना अभ्यास, विभिन्न कलष्टरका आधारमा गरिएका छलफल र अन्तरक्रिया, कञ्चनपुरको बेलौरी नगरपालिकाले नेपालगञ्ज उपमहानगरपालिकामा भएका विपद सम्बन्धि असल अभ्यासबारे लिएको स्थलगत जानकारी लगायतका गतिविधि सम्पन्न गरिएको बताए । नगर प्रमुख प्रशान्त विष्टले विपद पूर्व तयारी, प्रतिकार्य र पुनर्लाभको कामलाई प्रभावकारी बनाउन उच्च प्राथमिकताका साथ काम गरिरहेको बताउँदै सुपरसंगको सहकार्यले विपद व्यवस्थापनमा सघाउ पुगिरहेको उल्लेख गरे ।

बैठकमा रेडक्रस बाँकेका उपनिर्देशक दोलख डाँगीले तातो हावाको प्रकोप (लू) प्रतिकार्यका लागि भइरहेको प्रयास र साझेदारीबारे जानकारी गराएको आपतकालीन कार्यसञ्चालन केन्द्रका सूचना ब्यवस्थापन अधिकृत रुपन ज्ञवालीले बताए । नेपालगञ्जमा रेडक्रससंगेको सहकार्यमा कुलिंग सेन्टर निर्माण भइरहेको छ । बैठकमा विपद तथा वातावरण समिति संयोजक समिर प्रताप सिंह, विपद फोकल पर्सन दिपेन्द्र श्रेष्ठ लगायत विभिन्न शाखा-महाशाखाका प्रमुख एवम् प्रतिनिधि तथा रेडक्रसका केन्द्रिय प्रतिनिधिहरुको समेत उपस्थिति थियो ।

युरोपियन युनियनको सहयोगमा नेपालगञ्ज उपमहानगरपालिकामा सुपर सञ्चालनमा रहेको छ । युरोपियन युनियनको आर्थिक सहयोग तथा युएनडिपी, युनिसेफ, युएन ओमन र एचआईको साझेदारी एवम् सिडिएम नेपालको प्राविधिक सहयोगमा नेपालगञ्ज उपमहानगरपालिकामा सञ्चालित सुपर कार्यक्रमले विपद पूर्व तयारी र प्रतिकार्यका लागि काम गरिरहेको छ ।

प्रकाशित मिति: मंगलबार, वैशाख १६, २०८२ १८:१२

प्रतिक्रिया दिनुहोस्