बालबालिकालाई सकारात्मक सोच विषयक तालिम

स्थानीय

गृहपृष्ठ
स्थानीय
बालबालिकालाई सकारात्मक सोच विषयक तालिम

बालबालिकालाई सकारात्मक सोच विषयक तालिम

सोमबार, वैशाख २९, २०८२ बागेश्वरी पोस्ट

नेपालगन्ज । नेतृत्व विकास तथा सकारात्मक सोच विषयक दुई दिने तालिम नेपालगन्ज उपमहानगरपालिका वडा नम्बर १९ मा सम्पन्न भएको छ । नेपालगन्ज उपमहानगरपालिका वडा नम्बर १९ को सहयोग र युवा घरको आयोजनामा आइतबारदेखि सुरु भएको तालिम सोमबार सम्पन्न भएको हो ।

तालिमको समापन समारोहमा बोल्दै नेपालगन्ज उपमहानगरपालिका वडा नम्बर १९ का वडा सदस्य रामसुहावन कुर्मीले तालिमबाट सिकेका कुराहरुलाई ब्यबहारमा लागू गर्नुपर्ने बताएका थिए । बालबालिकाहरु समाजको खम्बा भएको बताउँदै उनले सकारात्मक सोचको विकास गरेर सकारात्मक कार्यमा लाग्नुपर्ने बताए ।

दुई दिनसम्म चलेको तालिमको समापनमा बोल्दै वडा सदस्य मन्सुर खाँले तालिमबाट नेतृत्व विकास र सकारात्मक सोचको वारेमा सबैलाई जानकारी भएको बताउँदै सबैले आ-आफ्नो जिम्मेवारी पूरा गर्न लागिपरेमा समुदायमा सकारात्मक विकास गर्न सम्भव हुने बताए । वडाका नासु मनोज रिजालले बालबालिकाको चौतर्फी विकासका लागि वडा कार्यालयले हरेक वर्ष कार्यक्रम गर्दै आएको बताउँदै तालिमबाट बालिबालिकाको नेतृत्व तथा क्षमता विकासमा टेवा पुगेको बताए ।

तालिमका सहभागीहरुले तालिमका विषयवस्तु समय-सान्दर्भिक र उपलब्धिमूलक भएको बताएका थिए । तालिमबाट जीवनोपयोगी सीप, सकारात्मक सोच र नेतृत्व विकासका विविध विषयमा ज्ञान प्राप्त भएको सहभागीहरुको भनाई थियो । तालिममा प्रशिक्षक मन भण्डारी र शिव कुमार बर्माले बाल अधिकार, बाल संरक्षण, व्यक्तित्व विकास र सकारात्मक सोचका सूत्रहरु, नेतृत्व, नेतृत्वको अवधारण, नेतृत्वको परिभाषा, नेता, नेताको परिभाषा, नेतृत्वको भूमिका, नेतृत्वको आवश्यकता, नेतृत्वका लागि आवश्यक तत्वहरु, असल नेताका गुणहरु, नेतृत्व कसरी गर्ने, नेतृत्वका कार्यहरुको विषयमा तालिम दिएका थिए भने त्यसक्रममा समूह अभ्यास तथा छलफल समेत गरिएको थियो ।

तालिममा वडाका जनप्रतिनिधिहरु, कर्मचारीहरु, वडा तथा विद्यालय स्तरीय बाल क्लव संजाल तथा वाल क्लवका पदाधिकारीहरु लगायत २५ जनाको सहभागिता रहेको थियो ।

प्रकाशित मिति: सोमबार, वैशाख २९, २०८२ १४:५९