बैजनाथमा लागूऔषधबारे सचेतनामूलक अभिमुखीकरण

स्थानीय

गृहपृष्ठ
स्थानीय
बैजनाथमा लागूऔषधबारे सचेतनामूलक अभिमुखीकरण

बैजनाथमा लागूऔषधबारे सचेतनामूलक अभिमुखीकरण

मंगलबार, वैशाख ३०, २०८२ बागेश्वरी पोस्ट

नेपालगञ्ज । बाँकेको बैजनाथ गाउँपालिकामा लागूऔषध एवं बालबालिकामा हुने हानी नियन्त्रणका लागि अभिभावक तथा बालबालिकालाई अभिमुखीकरण गरिएको छ । पछिल्लो समय लागूऔषध दुव्र्यसनका घटना बढीरहेको बेला समुदायका नागरिकलाई सचेत बनाउन अभियानको रुपमा कार्यक्रम सञ्चालन गरिएको हो ।

बैजनाथ गाउँपालिकाको सहयोगमा सार्थक मल्टिमिडिया प्रा.लि.नेपालगञ्जले अहिलेसम्म वडा नं. २, ३, ४, ५, ६, ७ र ८ मा बालबालिका तथा अभिभावकका लागि लागूऔषधविरुद्धको सचेतनामुलक अभिमुखीकरण सम्पन्न गरिसकेको कार्यक्रम संयोजक जयसिंह केसीले जानकारी दिए ।

कार्यक्रममा बैजनाथ गाउँपालिका स्वास्थ्य शाखा प्रमुख लक्ष्मणराज शाही, पत्रकार राकेश कुमार मिश्र, प्रहरी हवल्दार लक्ष्मी शाही, जनस्वास्थ्य निरिक्षक श्यामबीर शाही लगायतले लागूऔषधका कारण मानव स्वास्थ्यमा पर्ने समस्या, कारण, लक्षण, पारेको प्रभाव, उपचार, प्रहरी अनुसन्धान, सहयोग, लागूऔषध सम्बन्धि कानूनी दण्ड सजायको व्यवस्था, समुदाय सचेतना, अभिभावकको भूमिका लगायतका बारेमा सहजीकरण गरेका छन् ।

सोमबार बैजनाथ गाउँपालिका वडा नं. २ मा अभिमुखीकरण कार्यक्रम गरिएको छ । कार्यक्रमका सहभागीले लागूऔषधको दुव्र्यसनमा युवाहरु फस्दै गरेकाले यसबारे सचेतना अभिबृद्धिसंगै अभिभावकको भूमिका महत्वपूर्ण भएको भन्दै अभिभावकले आफ्ना बालबालिकाहरुलाई बढी निगरानीमा राख्नुपर्ने बताएका थिए । कार्यक्रममा बैजनाथ गाउँपालिका स्वास्थ्य शाखा प्रमुख शाहीले लागूऔषधले मानव स्वास्थ्यमा परेको समस्याका साथै चिन्ह, लक्षण र बच्ने उपाय तथा उपचार गर्दा पूर्ण निको हुने बताए ।

वडा सदस्य भुमिसरा थापाको अध्यक्षतामा भएको कार्यक्रममा सितादेबी विश्वकर्मा, शोभा थारु, भवानी दमाई, स्वास्थ्य केन्द्र प्रमुख खेमराज सापकोटा, इलाका प्रहरी कार्यालय नौबस्ताका निमित्त प्रमुख लक्ष्मी शाही लगायतले बोलेका थिए । कार्यक्रममा बालबालिका, अभिभावक, शिक्षक, बुद्धिजिवी, समाजसेवी लगायत गरी करीब ६० जनाको सहभागिता रहेको थियो । पालिकाको वडा नं. १ मा सो कार्यक्रम गरी अभिमुखीकरणको समापन गरिनेछ ।

प्रकाशित मिति: मंगलबार, वैशाख ३०, २०८२ १४:४१