राप्तीसोनारीको बैँसामा पार्क शिलान्यास

स्थानीय

गृहपृष्ठ
स्थानीय
राप्तीसोनारीको बैँसामा पार्क शिलान्यास

राप्तीसोनारीको बैँसामा पार्क शिलान्यास

सोमबार, जेठ ५, २०८२ बागेश्वरी पोस्ट

राप्तीसोनारी (बाँके) । आन्तरिक पर्यटनमा पार्कले महत्वपूर्ण भूमिका निर्वाह गरेका छन् । पर्यटनलाई बढवा दिने गरी निर्माण गरिएका ती पार्कहरुमा आन्तरिक पर्यटकको चाप पनि उस्तै देखिन्छ । भीडभाड र दैनिक कामको चापबाट छुटकारा पाउन र तनावमुक्त हुन मान्छेहरुले पछिल्लो समय पार्क खोज्दै हिँड्छन् । पार्कहरु आर्यआर्जन र रोजगारीको माध्यम पनि बनेका छन् । पछिल्लो समय पर्यटन विकासलाई प्राथमिकता दिएको राप्तीसोनारीले पनि वडा नम्बर ३ बैँसामा थारु सांस्कृतिक ग्राम पूर्वाधार निर्माण अन्तर्गत पार्कको निर्माण कार्य सुरु गरेको छ ।

नेपाल सरकारको विशेष अनुदानमा राप्तीसोनारी गाउँपालिका अध्यक्ष तप्त बहादुर पौडेलले आज एक कार्यक्रमका बीच शिलान्यास गरेका हुन् । यसको पर्यटन डिभिजन कार्यालय कोहलपुरले ठेक्का लगाएको थियो । कुल रकम १ करोड २५ लाख रुपैयाँमा आगामी असार मसान्तसम्म निर्माण सम्पन्न गर्ने गरी ९० लाख १८ हजार ९ सय ४२ रूपैयाँ २३ पैसामा ओसियन कन्स्ट्रक्सन कोहलपुरले पार्कको निर्माण कार्य सुरु गरेको हो ।

निर्माण सम्पन्नपछि यसले यहाँको पर्यटनमा महत्वपूर्ण भूमिका खेल्ने अपेक्षा गरिएको छ । गाउँपालिकाका अध्यक्ष पौडेलले धार्मिक, कृषि र पूर्वाधार पर्यटनमा जोड दिएको बताए । सोही अनुसार पालिकामा पार्क, मठमन्दिर निर्माण भइरहेको भन्दै उनले भने, ‘यहाँको आर्थिक स्थिति उकास्नलाई भए पनि पर्यटनमा लगानी गर्नुपर्नेछ ।’ यहाँ पर्यटकीय प्रचूर सम्भावना हुँदाहुँदै पनि सिर्जित फोहोर र भएका संरचनाहरुको संरक्षण र सौन्दर्यकरण गर्न नसक्दा पर्यटक पुग्न नसकेको उनी बताउँछन् । ‘वर्षौंदेखि पर्यटन पूर्वाधार छन् । तर, फोहोर व्यवस्थापन नहुँदा आकर्षक छैनन्,’ उनले भने, ‘हामीले फोहोरको उचित व्यवस्थापन गर्न नसक्दा ती फोहोरले गिज्याइरहेका छन् । वातावरणीय सौन्दर्य खस्किँदै गएको छ । हाम्रो सबै गतिविधि वातावरणीय सौन्दर्यलाई ख्याल गर्ने गरी हुनुपर्ने भन्दै उनी भन्छन्, ‘राप्तीसोनारीमा पर्यटकीय गतिविधि सम्भव छन् । सबै हातेमालो गरी अगाडि बढौं ।’

राप्तीसोनारीमा भूवरभवानी, बर्फानी लगायतका पर्यटकीय क्षेत्र हुँदा हुँदै पनि यहाँका बासिन्दा बाहिर जानुपर्ने बाध्यता भएको उनी बताउँछन् । ‘हाम्रा घरै अगाडि पर्यटकीय क्षेत्र छन् । हामी चिसापानी, गाभार लगायतका क्षेत्रमा मनोरञ्जनका लागि पुग्छौं,’ उनले भने, ‘जसले गर्दा हाम्रो पैसा अन्यत्रै गएको छ । हाम्रो त्यो पैसा यहीँ राख्ने र अन्य पर्यटकलाई भित्र्याएर आम्दानी लिने योजना पालिकाले निर्माण गर्दैछ ।’ जसका लागि सिक्टा सिँचाई आयोजनाको बाँधस्थलमा बोटिङ निर्माणका लागि आईई गरिने उनी बताउँछन् । राप्तीसोनारीमा पर्यटकीय गतिविधि बढ्दा यहाँको आयस्रोत मात्र होइन, क्षमता अभिवृद्धि समेत हुने उनको भनाई छ ।

वडा नम्बर ३ का वडाध्यक्ष मिनकुमार चौधरीले यस पार्कले यहाँ पर्यटनमैत्री वातावरण बनाउन मद्दत पुग्ने बताए । पर्यटकको संख्या बढ्दै जाँदा रोजगारीका अवसर सिर्जना हुने उनको भनाई छ । उक्त पार्कमा कोसेली घर, दुई वटा झुला, लव साइन, ग्रीन बेल्ट, ब्यायाम पार्क, गेट निर्माण र वृक्षारोपण गरिनेछ । त्यस्तै सोही रकमबाट भूवरभवानी मन्दिरमा मञ्च र चेन्जिङ रुम निर्माण गरिने गाउँपालिकाले जनाएको छ । यसका साथै निर्माणाधीन मन्दिरहरुको कामलाई पनि सम्पन्न गर्ने बताइएको छ ।

स्वच्छ, सफा र सुन्दर सहरका लागि सहरी पार्कको योगदान निकै महत्वपूर्ण हुन्छ । पार्क अर्थात् उद्यानको महत्व बहुआयामिक हुन्छ । पार्कभित्रका रुख बिरुवासहितको हरियाली र शुद्ध वातावरणसँगको सामीप्यले मनलाई शान्त राख्न सहयोग र्पुयाउँछ । त्यहाँको खुला स्थानमा हल्का व्यायाम र पैदल हिँडाईले शारीरिक स्वस्थतामा पनि वृद्धि गर्ने गाउँपालिकाका अध्यक्ष पौडेलले बताए ।

प्रकाशित मिति: सोमबार, जेठ ५, २०८२ १९:०६