बैजनाथ वडा नम्बर २ को सार्वजनिक सुनुवाई सम्पन्न

स्थानीय

गृहपृष्ठ
स्थानीय
बैजनाथ वडा नम्बर २ को सार्वजनिक सुनुवाई सम्पन्न

बैजनाथ वडा नम्बर २ को सार्वजनिक सुनुवाई सम्पन्न

बुधबार, जेठ ७, २०८२ बागेश्वरी पोस्ट

नेपालगञ्ज । बाँकेको बैजनाथ गाउँपालिका वडा नम्बर २ कार्यालयले प्रदान गर्ने सेवा र सुविधाको प्रभावकारिता बिषयक सार्वजनिक सुनुवाई बास नेपालको सहजीकरणमा बुधबार सम्पन्न भएको छ । बैजनाथ गाउँपालिका वडा नम्बर २ को आयोजनामा वडा कार्यालय परिसरमा भएको सुनुवाईमा सेवा प्रदायक निकाय र वडाबासीहरुका बीचमा भएको छलफलको अन्त्यमा ६ बुँदे साझा प्रतिबद्धताको घोषणा गरिएको छ ।

सुनुवाईमार्फत भएका प्रतिबद्धताहरुमा वडाभित्रका विभिन्न टोलहरुमा आवश्यक रहेको तर चालू आर्थिक बर्षको कार्यक्रममा समाबेश हुन नसकेको योजनाहरुलाई आगामी आर्थिक बर्षमा प्राथमिकीकरणमा राखी बजेट विनियोजन गर्ने, मन्द्रादेखि कारागार हुँदै बौद्ध मन्दिरसम्म जाने सडक धुलाम्मे भई आवतजावतमा समस्या भइरहेकाले तत्काल प्रदेश सरकारसँग समन्वय गरी स्तरोन्नतिका लागि योजना अगाडि बढाउने, वडामा पिउने पानीको समस्या रहेकाले यथाशक्य खानेपानीको ब्यवस्थापन गर्ने, वडा कार्यालयभित्र रहेको जानकी मन्दिर ब्यवस्थापनका लागि बजेट विनियोजन भइसकेकाले तत्काल मन्दिर रंगरोगन र घेरबार गर्ने, वडाको रिहार टोलमा आवतजावतका लागि बाटो नभएको गुनासो आएकाले उक्त टोलमा सडक निर्माण आवश्यक रहेको समुदायबासीहरुको सहमतिसहित वडामा निवेदन आएमा निर्माण कार्यको पहल गर्ने र निस्सा वितरणका लागि जग्गा फाराम र निबेदनसहित वडामा आएमा प्रक्रिया अगाडि बढाउने प्रतिबद्धता गरिएको छ ।

यसरी गरिएका प्रतिबद्धताहरु सुनुवाईमा उपस्थित सरोकारवाला र सहभागीहरुले ताली बजाएर अनुमोदन गरेका थिए । प्रतिबद्धतामा वडा अध्यक्ष राजु रुचाल ठकुरी, वडा सदस्य भुमिसरा थापा मगर, भुवाने दमाई, शोभा कुमारी थारु, सितादेवी विश्वकर्मा र वडा सचिव मदन प्रसाद थारुले हस्ताक्षर गरेका थिए । बास नेपालका जनसम्पर्क अधिकृत माधब कार्कीले सहजीकरण गरेको सुनुवाईमा स्वागत तथा सुनुवाईको उद्देश्यमाथि बास नेपालका शोभा थापा मगरले प्रकाश पारेकी थिइन् भने चालू आर्थिक बर्षमा वडा कार्यालयले गरेको प्रगतिको प्रस्तुतिकरण वडा सचिव थारुले गरेका थिए । सुनुवाईमा एक सय बढी वडाबासीहरुको सहभागिता रहेको थियो ।

प्रकाशित मिति: बुधबार, जेठ ७, २०८२ २०:५०