पत्रकार गैरे र सामाजिक अभियन्ता जोशीको बृत्तचित्र निर्माण

स्थानीय

गृहपृष्ठ
स्थानीय
पत्रकार गैरे र सामाजिक अभियन्ता जोशीको बृत्तचित्र निर्माण

पत्रकार गैरे र सामाजिक अभियन्ता जोशीको बृत्तचित्र निर्माण

मंगलबार, जेठ १३, २०८२ बागेश्वरी पोस्ट

नेपालगञ्ज । बाँके जिल्लामा पत्रकारिता क्षेत्रबाट लोकतन्त्रको बहालीको लागि निरन्तर संघर्ष गरेका अग्रज पत्रकार झलक गैरेको वृत्तचित्र सार्वजनिक भएको छ । एकाउन्टिविलिटि ल्याव र बास नेपालद्वारा सञ्चालित युवा नेतृत्व र जवाफदेहिता परियोजना अन्तर्गत मेरो कथा कार्यक्रममा उक्त वृत्तचित निर्माण गरिएको थियो । बाँकेमा पन्नालाल गुप्ता (चाचाजी) पछिको यो दोस्रो पत्रकारको वृत्तचित्र हो । २०६२/६३ को जनआन्दोलनमा लोकतन्त्रको पक्षमा जनताको हक र हितको लागि पत्रकारिताको माध्यमबाट आवाज उठाएको र कलम चलाएको योगदानको आधारमा उक्त बृत्तचित्र निर्माण भएको थियो । सोही कार्यक्रममा सामाजिक अभियन्ता दिपेन्द्र कुमार जोशीको वृत्तचित्र समेत सार्वजनिक गरिएको छ ।

वृत्तचित्रमा गैरेको आत्मकथा, संघर्षको यात्रा, पत्रकारिताको इतिहास र भूमिका, पत्रकारिता क्षेत्रमा संगठनात्मक रुपमा गरेको योगदान, युवा पुस्तालाई दिएको सत्मार्ग, लोकतन्त्रका लागि चालेका अभियानहरु, लोकतन्त्रको लागि लडिरहँदा भोगेका तिता अनुभवहरु समेटिएको छ । वृत्तचित्र प्रदर्शनी कार्यक्रममा बोल्दै गैरेले आफूले एक्लै सुरुवात गरेको अभियानलाई समाजले उच्च मूल्यांकन गरेकोमा गर्वको महसुस भएको बताउँदै आम युवाहरुलाई विदेशको सपना त्यागेर स्वदेशमै मातृभूमिको लागि पसिना बगाउन सुझाव दिए । उनले युवाहरुलाई सचेत गराउँदै आम युवाहरु अहिलेको अवस्थामा उचित मार्गदर्शनको खोजीमा रहेको र समाज तथा देशको राजनीतिक अवस्थाले युवालाई सही मार्गदर्शन गर्न नसकेको तर्क प्रस्तुत गरे ।

कार्यक्रममा नेपाल उद्योग वाणिज्य महासंघका पूर्व केन्द्रीय सदस्य कृष्ण प्रसाद श्रेष्ठले गैरे पत्रकारिताको ऐना भएको र उक्त ऐनाबाट समाजमा दैनिक नेपालगञ्जका नामबाट संसार नियाल्न पाएकोमा खुसी व्यक्त गर्दै उनले पत्रकारिता र लोकतन्त्रका लागि गरेको संघर्षको प्रशंसा गरे । उनले सामाजिक अभियन्ता जोशीले लागूऔषध विरुद्ध चालेको कदमको उच्च सम्मान गर्दै लागुऔषध दुब्यर्सन रोक्न सबै लाग्नुपर्नेमा जोड दिए ।

नेपाल पत्रकार महासंघ बाँकेका अध्यक्ष नवीन गिरीले आफूले अंगालेको पेशाको व्यक्तिको वृत्तचित्र निर्माण भएकोमा समग्र पत्रकार जगतकै शिर उच्च भएको तर्क गर्दै बास र एकाउन्टिविलिटि ल्यावलाई धन्यवाद ज्ञापन गरे । उनले पत्रकार गैरेले युवा पुस्तालाई समेत पत्रकारिता पेशामा डो¥याउन प्रेरणा प्रदान गरेको बताए । कार्यक्रममा सामाजिक अभियन्ता जोशीले लागुऔषध नियन्त्रणको लागि आफूले निरन्तर प्रयास गरिरहेको र उक्त अभियानमा सवै जुट्न आग्रह गरे ।

कार्यक्रममा पत्रकार, शिक्षक, सामाजिक संघसंस्थाको प्रतिनिधि, जनप्रतिनिधि, विभिन्न पेशामा संलग्न युवाहरुको सहभागिता रहेको थियो । कार्यक्रमको सहजीकरण बास नेपालका कार्यक्रम संयोजक रबिन्द्र बोहराले गरेका थिए भने बास नेपालका कार्यकारी निर्देशक नमस्कार शाहले कार्यक्रमको उद्देश्यबारे प्रकाश पारेका थिए ।