समुदायमा अग्रणी भूमिका निर्वाह गर्ने मुस्लिम महिलाहरुको प्रतिबद्धता

स्थानीय

गृहपृष्ठ
स्थानीय
समुदायमा अग्रणी भूमिका निर्वाह गर्ने मुस्लिम महिलाहरुको प्रतिबद्धता

समुदायमा अग्रणी भूमिका निर्वाह गर्ने मुस्लिम महिलाहरुको प्रतिबद्धता

मंगलबार, जेठ १३, २०८२ बागेश्वरी पोस्ट

नेपालगञ्ज । सकारात्मक सोचका साथ समुदायमा अग्रणी भूमिका निर्वाह गर्ने बाँकेको खजुरामा सम्पन्न एक तालिममा सहभागीहरुले बताएका छन् । मुस्लिम महिलाहरुका लागि आत्मनिर्भर एवम् नेतृत्व विकास सम्बन्धि तीन दिने तालिमको समापन कार्यक्रममा बोल्दै सहभागी महिलाहरुले यस्तो बताएका हुन् ।

तालिमको समापनमा प्रतिक्रिया मन्तब्य राख्दै सहभागीहरुले सकारात्मक सोचका साथ अगाडि बढेमा मुस्लिम महिलाहरुले समेत अन्य महिला सरह सफलता हासिल गर्न सक्ने कुराको अनुभूति तालिमबाट भएको बताए । समुदायमा असल कार्य गर्न सधैं अग्रसर रहने बताउँदै तालिमबाट सिकेको कुरालाई ब्यवहारमा लागू गर्ने सहभागीहरुले प्रतिबद्धता गरेका छन् ।

तालिमको समापन कार्यक्रममा बोल्दै खजुरा गाउँपालिका महिला तथा बालवालिका शाखा प्रमुख सुशिला न्यौपानेले तालिम पश्चात सहभागीहरुको ब्यवहारमा परिवर्तन आएको बताउँदै तालिमबाट सिकेको कुरालाई ब्यवहारमा लागू गर्न अनुरोध गरिन् । गाउँपालिकाले महिलाहरुका लागि विभिन्न तालिमहरु आयोजना गर्ने गरेको बताउँदै पालिकामार्फत हुने कार्यक्रममा सहभागिता जनाउन अनुरोध गरिन् । यसैगरी कार्यक्रममा बोल्दै बास नेपालका कार्यकारी निर्देशक नमस्कार शाहले मुस्लिम महिलाहरुको क्षमता विकास गरी आत्मनिर्भर बनाउने उद्देश्यले तालिमको आयोजना गरिएको भन्दै सहभागीहरुको प्रतिक्रिया सुन्दा तालिम उद्देश्यपरक भएको बताए । उनले तालिमबाट सिकेको कुरा आफ्नो हक अधिकारहरुको लागि प्रयोग गर्न सहभागी महिलाहरुलाई अनुरोध गरे ।

बास नेपालका केन्द्रीय अध्यक्ष शिव कुमार बर्माको अध्यक्षतामा भएको तालिम समापनको सञ्चालन बास नेपालका निर्देशक हेमराज भट्टले गरेका थिए । जेष्ठ ११ गतेदेखि सञ्चालन भएको तालिममा बासका केन्द्रीय अध्यक्ष शिव कुमार बर्मा, निवर्तमान अध्यक्ष लुना बुढाथोकी, उपाध्यक्ष दिला शाह, महासचिव कल्पना अधिकारी, पूर्व अध्यक्ष रमेश सिटौला, निर्देशक हेमराज भट्ट, मुस्लिम अगुवा मैमुना सिद्धिकीले आत्मनिर्भर र नेतृत्वका विभिन्न बिषयमा सहजीकरण गरेका थिए । तालिममा खजुरा गाउँपालिकाका बिभिन्न वडाका ३३ जना मुस्लिम समुदायका महिलाहरुको सहभागिता रहेको थियो । तालिमको संयोजन बास नेपालका राष्टि बुढा मगरले गरेका थिए ।

प्रकाशित मिति: मंगलबार, जेठ १३, २०८२ २२:१३

प्रतिक्रिया दिनुहोस्