युवालाई नेतृत्व विकास तथा युवामैत्री स्थानीय शासनका विषयमा अभिमुखीकरण

स्थानीय

गृहपृष्ठ
स्थानीय
युवालाई नेतृत्व विकास तथा युवामैत्री स्थानीय शासनका विषयमा अभिमुखीकरण

युवालाई नेतृत्व विकास तथा युवामैत्री स्थानीय शासनका विषयमा अभिमुखीकरण

बिहीबार, जेठ १५, २०८२ बागेश्वरी पोस्ट

नेपालगन्ज । नेपालगन्ज उपमहानगरपालिका वडा नम्बर ९ का युवाहरुलाई नेतृत्व विकास तथा युवामैत्री स्थानीय शासनका बिषयमा एक दिने अभिमुखीकरण गरिएको छ । युवा बर्गलाई सशक्तिकरण कार्यक्रम अन्तरगत वडा कार्यालयको सहयोगमा नाइस नेपालगन्जले आज उक्त अभिमुखीकरण गरेको हो ।

अभिमुखीकरण कार्यक्रमको उद्घाटन सत्रमा बोल्दै प्रमुख अतिथि एबम् नेपालगन्ज उपमहानगरपालिका वडा नम्बर ९ का अध्यक्ष गोविन्द रेग्मीले वडाभित्र रहेका युवाहरुको क्षमता अभिबृद्धि गरी सामाजिक कार्यमा लाग्न अभिप्रेरित गर्ने उद्देश्यले कार्यक्रमको आयोजना गरिएको बताए । युवाहरुले अगुवाई गरी कार्य गरेमा मात्रै समाजको विकास सम्भव हुने भन्दै अभिमुखीकरणले युवाहरुको क्षमता अभिबृद्धि गर्ने विश्वास ब्यक्त गरे । उनले युवामैत्री स्थानीय शासनको अवधारणा अनुसार वडा अगाडि बढ्ने योजनामा रहेको बताउँदै वडाका सबै युवाहरुलाई एकजुट भएर लाग्न अनुरोध गरे । वडा भित्रका युवाहरुको क्षमता अभिबृद्धि गर्ने, युवाहरुको नेतृत्व विकास गरी युवामैत्री स्थानीय शासनबारे जानकारी गराउने, युवा र वडा बीचको समन्वय र सम्बन्धलाई बढावा दिँदै वडाको समग्र विकासमा युवा परिचालन गर्ने र युवा क्लबको आगामी कार्ययोजना तयार गर्ने उद्देश्यले अभिमुखीकरण गरिएको थियो ।

अभिमुखीकरण पश्चात् सहभागी युवाहरुले वडा स्तरीय युवा क्लबलाई सक्रिय बनाउँदै वडाको अभियानमा सहयोग गर्ने, सचेतनामूलक कार्यक्रम सञ्चालन गर्ने, सामाजिक कुरीतिका बिषयमा आवाज प्रवाह गर्ने, नियमित सरसफाई अभियान सञ्चालन गर्ने लगायतका क्रियाकलाप समेटेर कार्ययोजना तयार गरेका छन् । अभिमुखीकरणले नेतृत्व, युवामैत्री स्थानीय शासन लगायतका बिषयमा जानकारी हुनुका साथै हौसला र उत्प्रेरणा थपेको बताउँदै सिकेको कुरालाई ब्यवहारमा लागू गर्ने सहभागीहरुले प्रतिबद्धता गरेका छन् ।

अभिमुखीकरणमा नेतृत्व विकास, युवामैत्री स्थानीय शासन, स्थानीय विकास निर्माण प्रक्रिया र युवा सहभागिताका विभिन्न बिषयमा बास नेपालका कार्यकारी निर्देशक नमस्कार शाह, नाइसका अध्यक्ष हेमराज भट्ट, मन भण्डारी र शोभा थापा मगरले सहजीकरण गरेका थिए ।

अभिमुखीकरणको क्रममा युवा उत्प्रेरक खुमेश सुवेदीले उत्प्रेरणा थपेका थिए ।नाइस नेपालगन्जका सहसचिब माधब कार्कीले सञ्चालन गरेको तालिममा स्वागत उपाध्यक्ष शोभा थापा मगरले गरेकी थिइन् । तालिममा वडाका विभिन्न टोलका गरी १८ जना युवाहरुको सहभागिता रहेको थियो ।

प्रकाशित मिति: बिहीबार, जेठ १५, २०८२ २३:०६

प्रतिक्रिया दिनुहोस्