बाँकेका स्थानीय तहहरुले विपद व्यवस्थापनमा सहकार्य गर्ने

स्थानीय

गृहपृष्ठ
स्थानीय
बाँकेका स्थानीय तहहरुले विपद व्यवस्थापनमा सहकार्य गर्ने

बाँकेका स्थानीय तहहरुले विपद व्यवस्थापनमा सहकार्य गर्ने

शुक्रबार, जेठ १६, २०८२ बागेश्वरी पोस्ट

नेपालगन्ज । बाँकेका स्थानीय तहहरुले विपद व्यवस्थापनमा सहकार्य गर्ने भएका छन् । सबै स्थानीय तहहरुबीच विपद जोखिम न्यूनीकरण र ब्यवस्थापनको क्षेत्रमा प्रभावकारीरुपले कार्य गर्नको लागि समन्वय, सहकार्य र स्रोत साझेदारीलाई प्रबद्र्धन गर्ने समझदारी भएको छ ।

आज कोहलपुर नगरपालिकाको आयोजनामा भएको कार्यक्रममा पालिकाहरुले विपद व्यवस्थापनमा भए गरेका गतिविधिको जानकारी गराउँदै आपतकालीन अवस्थामा साझेदारीमा काम गर्न जोड गरेका थिए ।

सहरी विपद तथा भूकम्पीय पूर्व तयारी परियोजना (सुपर) को समन्वय तथा कोहलपुर नगरपालिकाका नगर प्रमुख पूर्ण प्रसाद आचार्यको अध्यक्षतामा भएको बैठकमा नेपालगञ्ज उपमहानगरपालिकाका नगर प्रमुख प्रशान्त विष्ट, राप्तीसोनारी गाउँपालिका अध्यक्ष तप्त बहादुर पौडेल, खजुरा गाउँपालिका अध्यक्ष डम्मर विक लगायतले पूर्व सूचना प्रणाली, दमकल सेवा, छाडा चौपाया व्यवस्थापन, राहत व्यवस्थापन लगायतका कार्यहरुमा साझेदारीमा काम गर्नुपर्ने कुरामा जोड दिएका थिए । प्रमुख जिल्ला अधिकारी धर्मराज जोशीले समग्र जिल्लामा अन्तरपालिका समन्वयले प्रतिकार्य प्रभावकारी हुने बताए ।

बैठकले मनसूनको बेला समन्वय तथा सहकार्यलाई थप प्रभावकारी बनाउने, राप्तीसोनारी गाउँपालिकामा छाडा चौपाया व्यवस्थापनका लागि अन्य पालिकासंग साझेदारीका लागि समझदारी तयार गरी अर्को बैठकबाट निर्णय गर्ने लगायतका निर्णय गरेको सूपर कार्यक्रमका सूचना व्यवस्थापन अधिकृत रुपन ज्ञवालीले बताए ।

बैठकले आगामी अन्तरपालिका बैठक खजुरा गाउँपालिकाको आयोजनामा हुने समेत निर्णय गरेको छ । कार्यक्रममा बाँकेका पालिका प्रमुख, प्रमुख प्रशासकीय अधिकृत, विपद फोकल पर्सन, जिल्लास्थित सुरक्षा प्रमुखहरुको सहभागिता रहेको थियो ।

युरोपियन युनियनको आर्थिक सहयोग तथा युएनडिपी, युनिसेफ, युएन ओमन र एचआईको साझेदारी एवम् सिडिएम नेपालको प्राविधिक सहयोगमा सञ्चालित सहरी विपद् तथा भूकम्पीय पूर्व तयारी परियोजना (सुपर) ले विपद पूर्व तयारी र प्रतिकार्यका लागि काम गरिरहेको छ ।

प्रकाशित मिति: शुक्रबार, जेठ १६, २०८२ २०:४१