नेपालगञ्जमा दुई दिने महिला सशक्तिकरण तालिम सुरु

स्थानीय

गृहपृष्ठ
स्थानीय
नेपालगञ्जमा दुई दिने महिला सशक्तिकरण तालिम सुरु

नेपालगञ्जमा दुई दिने महिला सशक्तिकरण तालिम सुरु

शुक्रबार, जेठ २३, २०८२ बागेश्वरी पोस्ट

नेपालगञ्ज । महिला, बालबालिका तथा किशोरीहरुको सशक्तिकरणका लागि दुई दिने क्षमता विकास तालिम नेपालगञ्जमा सुरु भएको छ । नेपालगञ्ज उपमहानगरपालिकाको सहयोगमा सूचना र मानव अधिकार अनुसन्धान केन्द्र नेपालगञ्जद्वारा सञ्चालित तालिममा नेपालगञ्ज उपमहानगरपालिका अन्तर्गत विभिन्न वडाका ५० जना बढी महिला, बालबालिका र किशोरीहरुको सहभागिता रहेको छ ।

तालिममा महिला, बालबालिकाको कानुनी अधिकार, अवस्था, समस्या, लैङ्गिक समानता, लैङ्गिक विभेद, नेतृत्व विकास, यौन तथा प्रजनन स्वास्थ्य शिक्षा, बालविवाह, यौन हिंसा, निर्णय क्षमता विकास, कानुनी अधिकार, सुरक्षा, न्याय तथा पहुँचका उपाय, आर्थिक सशक्तिकरण लगायतका विषयमा जानकारी गराइने संस्थाका अध्यक्ष विश्वजित तिवारीले बताए ।

तालिममा नेपालगञ्ज उपमहानगरपालिकाका कार्यपालिका सदस्य बसन्त कनोजिया, अधिबक्ताहरु विश्वजित तिवारी, केवल सिंह थारु र जिज्ञासा तिवारी, राकेश कुमार मिश्र, एञ्जिला ज्ञवाली र रविन्द्र ज्ञवालीले सहजीकरण गरिरहेका छन् ।

तालिमको शुभारम्भ गर्दै नेपालगञ्ज उपमहानगरपालिकाका कार्यपालिका सदस्य कनोजियाले राज्यको हरेक तहमा महिलाको सहभागिता न्यून भएकाले उनीहरु आफैंमा पहिला सशक्त हुनुपर्नेमा जोड दिए । उनले महिलाहरुलाई जागरुक भएर आफ्ना कानुनी अधिकारको समेत कार्यान्वयन गर्न सुझाव दिए ।

संस्थाका उपाध्यक्ष कृष्णमुरारी प्रसाद भट्टको अध्यक्षतामा भएको उद्घाटन समारोहमा कार्यकारी निर्देशक राकेश कुमार मिश्र, कार्यक्रम म्यानेजर रविन्द्र कुमार ज्ञवाली लगायतले बोलेका थिए ।

प्रकाशित मिति: शुक्रबार, जेठ २३, २०८२ २१:५४

प्रतिक्रिया दिनुहोस्