अदालतद्वारा डुडुवा न्यायिक समितिको निरीक्षण

स्थानीय

गृहपृष्ठ
स्थानीय
अदालतद्वारा डुडुवा न्यायिक समितिको निरीक्षण

अदालतद्वारा डुडुवा न्यायिक समितिको निरीक्षण

शनिबार, जेठ ३१, २०८२ बागेश्वरी पोस्ट

डुडुवा (बाँके) । स्थानीय तह अन्तर्गत रहेका न्यायिक समितिहरुको कामकारवाही प्रक्रिया तथा सेवालाई थप गुणस्तरीय र प्रभावकारी बनाउन बाँके जिल्ला अदालतको टोलीले निरीक्षण गरेको छ । जिल्ला न्यायाधीश सहितको टोलीले शुक्रबार डुडुवा गाउँपालिका न्यायिक समितिको निरीक्षण तथा समितिसंग छलफल गरेको छ ।

गाउँपालिका अन्तर्गत रहेको न्यायिक समितिले प्रदान गर्ने सेवा, मुद्दा तथा विवाद दर्ता, मिसिलको व्यवस्थापन, राय तथा निर्णय, फैसला, मुद्दा सिफारिस र अभिलेखीकरण लगायत विभिन्न प्रक्रियाका बारेमा पालिकाका उपाध्यक्ष तथा न्यायिक समिति संयोजक शाहिदा बानोले जानकारी गराएकी थिइन् ।

जिल्ला अदालतका न्यायाधीश दिपक घिमिरेले डुडुवाको न्यायिक समितिको न्याय सम्पादन, अदालतको कार्यशैली, ढाँचा र निर्णय प्रक्रिया र व्यहोराको कार्य व्यवस्थित रहेको बताए । न्यायाधीश घिमिरेले न्यायिक समितिको कार्य उत्कृष्ट भएकाले सेवाग्राही तथा न्याय सम्पादनमा उल्लेख्य सहयोग पुग्ने विश्वास व्यक्त गर्दै न्यायिक समितिको काम कर्तव्य अधिकार, न्यायिक प्रक्रिया, मुद्दा दर्ता, मिसिल, निवेदनका ढाँचा, मुद्दाका विषय लगायत विभिन्न अदालती प्रक्रियाका बारेमा जानकारी समेत गराएका थिए ।

त्यस अवसरमा गाउँपालिका अध्यक्ष नरेन्द्र कुमार चौधरीले डुडुवा गाउँपालिकाका विभिन्न पक्ष र कार्ययोजनाका बारेमा जानकारी गराएका थिए । अनुगमन टोलीले न्यायिक समितिका पदाधिकारीहरुलाई अदालती प्रक्रिया र अभिलेखीकरणका बारेमा आवश्यक जानकारी गराएको थियो ।

भेटघाटमा गाउँपालिका अध्यक्ष चौधरी, उपाध्यक्ष बानो, न्यायिक समिति सदस्य काशीराम यादव, प्रमुख प्रशासकीय अधिकृत अशोक कुमार पाण्डेय लगायतको सहभागिता रहेको थियो । निरीक्षण टोलीले समितिमा रहेका विभिन्न अभिलेखीकरण गरिएका फाइल, मिसिल, रजिस्टर समेतको अध्ययन गरेको थियो । समितिको निरीक्षणपछि अदालतले प्रतिबेदन समेत प्रदान गर्ने जनाएको छ ।

न्यायिक समितिले चालू आर्थिक वर्षको साउनदेखि जेठ ३० गतेसम्म ८८ वटा मुद्दा दर्ता भएकोमा ५८ वटा मुद्दाको फच्र्यौट भएको र ३० वटा मुद्दा फच्र्यौटको प्रक्रियामा रहेको न्यायिक शाखाका कर्मचारी विवेक तिवारीले बताए ।

प्रकाशित मिति: शनिबार, जेठ ३१, २०८२ १८:०६

प्रतिक्रिया दिनुहोस्