रोजगारीमा महिला सहभागिता बढाउन कोहलपुरमा वृहत संवाद

स्थानीय

गृहपृष्ठ
स्थानीय
रोजगारीमा महिला सहभागिता बढाउन कोहलपुरमा वृहत संवाद

रोजगारीमा महिला सहभागिता बढाउन कोहलपुरमा वृहत संवाद

सोमबार, असार २, २०८२ बागेश्वरी पोस्ट

कोहलपुर । कोहलपुर नगरपालिका रोजगार सेवा केन्द्रले रोजगारीमा महिलाहरुको सहभागिता बढाउने उद्देश्य अनुरुप आज वृहत संवाद गरेको छ । रोजगारीमा महिला सहभागिता विषयक उक्त संवादमा सहभागी भएका महिलाहरुले स्थानीय सरकारले आवश्यकताका आधारमा सीपहरु प्रदान गरे रोजगारीको वातावरण सिर्जना हुने बताए । उनीहरुले सीप प्रदान गर्ने सवालमा सबैको पहुँचलाई सुनिश्चित गर्न पनि माग गरे ।

कोहलपुर नगरपालिका वडा नं.२ लोकनगरकी लक्ष्मी अधिकारीले स्थानीय सरकारबाट आयआर्जन गर्न सक्ने खालका तालिम र सीपहरु आवश्यक रहेको बताइन् । कोहलपुर नगरपालिका वडा नं.१२ की सिर्जना शर्माले आफू रोजगारीतर्फ उन्मुख हुन चाहे पनि सीपको अभावमा व्यवसाय गर्न नसकेको बताइन् । उनी सीप सिकेर सिलाईकटाई व्यवसाय गर्न चाहेको पनि बताउँछिन् ।

करीब दुई सय महिला सहभागी उक्त संवाद कार्यक्रमलाई सम्वोधन गर्दै कोहलपुर नगरपालिकाका नगर प्रमुख पूर्ण प्रसाद आचार्यले महिलाहरुलाई उद्यमशील बनाउन पालिकाले विभिन्न खाले सीपमूलक तालिम प्रदान गर्दै आएको बताए । उनले आवश्यकता र मागका आधारमा त्यस्ता तालिमहरु प्रदान गर्दै आएको बताउँदै प्राप्त तालिमको सदुपयोग गर्न पनि सुझाव दिए ।

कोहलपुर नगरपालिकाका नगर उपप्रमुख संगिता सुवेदीले महिलाहरुलाई आयआर्जनतर्फ उन्मुख गराउन सिलाईकटाई, व्युटिसियन, कफी, खाजा तथा नास्ता बनाउने लगायतका बेसिकदेखि एड्भान्ससम्मका तालिम प्रदान गर्दै आएको बताइन् । उनले तालिमसँगै आवश्यक प्रविधिको समेत पालिकाले सहयोग गर्दै आएको बताइन् । उनले पालिकाले पूर्वाधार विकासलाई मात्रै नभएर रोजगारीको वातावरण सिर्जना गर्ने गरी आफूहरु लागिपरेको बताइन् ।

कोहलपुर उद्योग बाणिज्य संघका अध्यक्ष प्रदिप भट्टराईले उद्यमशीलता र रोजगारमा जोडिन सर्वप्रथम व्यक्ति नै सक्रिय हुनुपर्ने बताए । उनले रोजगारीमा महिलाहरुको ठूलो सम्भावना रहेको बताउँदै उद्योग बाणिज्य संघले समन्वयकारी भूमिका निर्वाह गर्न तयार रहेको बताए । सफल उद्यमी गीता विकले उद्यमी बन्नका लागि लगानीको भन्दा पनि इच्छाशक्तिको बढी जरुरी रहेको बताइन् । कोहलपुर नगरपालिका रोजगार सेवा केन्द्रका संयोजक आशिष वर्माले महिलाहरुलाई रोजगार क्षेत्रको सम्भावना देखाउन संवाद कार्यक्रम गरिएको बताए । उनले कोहलपुर क्षेत्रका दुई सय महिलाहरुलाई कार्यक्रममा सहभागी गराएर रोजगारी क्षेत्रको अवस्था, पहिचान र सम्भावनाबारे संवाद गरिएको बताए ।

प्रकाशित मिति: सोमबार, असार २, २०८२ १८:११

प्रतिक्रिया दिनुहोस्