सामी कार्यक्रम प्रभावकारी !

स्थानीय

गृहपृष्ठ
स्थानीय
सामी कार्यक्रम प्रभावकारी !

सामी कार्यक्रम प्रभावकारी !

शुक्रबार, असार ६, २०८२ बागेश्वरी पोस्ट

नेपालगञ्ज । सुरक्षित आप्रवासन (सामी) कार्यक्रमको उपलब्धि तथा बार्षिक समिक्षा सम्पन्न भएको छ । नेपालगञ्जमा आज आयोजित उपलब्धि तथा बार्षिक समिक्षा कार्यक्रममा नेपालगञ्जका नगर प्रमुख प्रशान्त विष्टले सामी कार्यक्रम धेरै प्रभावकारी देखिएको उल्लेख गरे । उनले सामीको निरन्तरताको लागि बजेट ब्यवस्थापन गर्ने बताए । बैदेशिक रोजगारलाई सुरक्षित, मर्यादित र भरपर्दो बनाउन सामीले राम्रो काम गरिरहेको उनको भनाई छ । प्रमुख प्रशासकीय अधिकृत रामहरि शर्माले सामीले वैदेशिक रोजगारीलाई सुरक्षित, व्यवस्थित र मर्यादित बनाउन सूचनामा पहुँच, वित्तीय साक्षरता, मनोसामाजिक परामर्श, न्यायमा पहुँच र निःशुल्क सीप सेवा प्रदान गरिरहेको भन्दै त्यसको प्रभाव जनस्तरमा देखिएको बताए । कार्यक्रममा सामीका सम्पूर्ण कर्मचारीहरु लगायतको उपस्थिति थियो ।

सामीका जिल्ला संयोजक कमल सिंह नेपालीले बैदेशिक रोजगारीका क्रममा ठगीमा परेका, विरामी वा अंगभंग भएका, मृत्यु भएका कामदारका परिवारलाई क्षतीपूर्ति रकम, बीमा रकम लगायतमा सहायता प्रदान गरिएको बताए । बाँकेमा बैदेशिक रोजगारीका क्रममा समस्यामा परेका कामदार र कामदारका घरपरिवारलाई पछिल्लो एक बर्षमा १ करोड ३५ लाख ४३ हजार ५ सय रुपैयाँ आर्थिक सहायता प्रदान गरिएको छ । आर्थिक बर्ष २०८१/०८२ मा आप्रवासी स्रोत केन्द्रमा दर्ता भएका १०३ समस्या मध्ये ४२ वटा समाधान भएको नेपालीले बताए । ६१ वटा समस्या अझै प्रक्रियामा छन् । चालू आर्थिक बर्षमा बाँकेमा ४९ वटा ठगी, १८ जनाको मृत्यु, स्वास्थ्य समस्या भएका ३ जना, जेल २, हराएको १०, उद्धार १५, स्थानीय तहद्वारा रिफर २ र अन्य ४ गरी १०३ वटा समस्या आप्रवासी स्रोत केन्द्रमा दर्ता भएका थिए ।

सामी कार्यक्रम सञ्चालन भए यता बाँकेमा हालसम्म ६ करोड ९७ लाख ६२ हजार २ सय ५८ रुपैयाँ आर्थिक सहायता प्रदान गरिएको सामीका बाँके जिल्ला कार्यक्रम संयोजक नेपालीले जानकारी दिए । नेपालीका अनुसार हालसम्म आप्रवासी स्रोत केन्द्रमा दर्ता भएका ४२५ समस्या मध्ये २५१ वटा समाधान भएका छन् । १७४ वटा समस्या अझै प्रक्रियामा छन् ।

बाँकेमा नेपालगञ्ज उपमहानगरपालिका, कोहलपुर नगरपालिका, बैजनाथ गाउँपालिका, खजुरा गाउँपालिका, जानकी गाउँपालिका र नरैनापुर गाउँपालिकामा सामी कार्यक्रम सञ्चालनमा छ । आगामी आर्थिक बर्षदेखि डुडुवा र राप्तीसोनारीमा सामी कार्यक्रम सञ्चालन हुँदैछ । बाँकेमा आर्थिक बर्ष २०७५/०७६ देखि सामी कार्यक्रम सुरु भएको हो ।

सामी कार्यक्रम ७७ जिल्लाका २६७ स्थानीय तहमा सञ्चालित छ । सामी कार्यक्रम नेपाल सरकार र स्वीस सरकारको द्विपक्षीय सम्झौता अन्तर्गत सञ्चालनमा छ । यो श्रम, रोजगार तथा सामाजिक सुरक्षा मन्त्रालय र स्थानीय सरकारको नेतृत्वमा कार्यान्वयन भइरहेको छ । कार्यक्रमलाई स्वीस सरकारको तर्फबाट प्राविधिक सहयोग हेल्भेटास नेपालले उपलब्ध गराएको छ ।

प्रकाशित मिति: शुक्रबार, असार ६, २०८२ २२:०४

प्रतिक्रिया दिनुहोस्