प्रारम्भिक द्रुत लेखाजोखा, सूचना व्यवस्थापन तथा मुलभूत मानवीय मापदण्ड तालिम सुरु

स्थानीय

गृहपृष्ठ
स्थानीय
प्रारम्भिक द्रुत लेखाजोखा, सूचना व्यवस्थापन तथा मुलभूत मानवीय मापदण्ड तालिम सुरु

प्रारम्भिक द्रुत लेखाजोखा, सूचना व्यवस्थापन तथा मुलभूत मानवीय मापदण्ड तालिम सुरु

शुक्रबार, असार १३, २०८२ बागेश्वरी पोस्ट

नेपालगञ्ज । नेपाल रेडक्रस सोसाइटी र नेपालगञ्ज उपमहानगरपालिको आयोजनामा ३ दिने प्रारम्भिक द्रुत लेखाजोखा, सूचना व्यवस्थापन तथा मुलभूत मानवीय मापदण्ड तालिम नेपालगञ्जमा सुरु भएको छ । सुपर परियोजनाको प्राविधिक सहयोगमा सञ्चालित उक्त तालिमको मुख्य उद्देश्य विपद्पछि समुदायलाई तत्काल उपलब्ध गराउने मानवीय सहायताका कार्यहरु प्रभावकारी प्रवाह गर्न सरोकारवालाहरुको क्षमता अभिबृद्धि गर्ने रहेको छ ।

तालिममा नेपालगञ्ज उपमहानगरपालिकाका विषयगत शाखाका प्रमुख एवं प्रतिनिधि, जिल्ला प्रशासन कार्यालय, नेपाल प्रहरी, सशस्त्र प्रहरी, नेपाली सेना, नेपाल रेडक्रस सोसाइटी मनिकापुर र सदरलाइन उपशाखा, नगरस्तरीय अपाङ्गता समिति लगायत प्रतिनिधिहरुको सहभागिता रहेको छ । नेपालगञ्ज उपमहानगरपालिका वन, वातावरण तथा विपद् व्यवस्थापन समिति संयोजक समीर प्रताप सिंहले विपद् पूर्व तयारी तथा व्यवस्थापनका लागि नगरपालिकाबाट योजनाबद्ध कार्यक्रमहरु सञ्चालन भइरहेको बताए । नेपाल रेडक्रस सोसाइटी बाँके शाखाका सभापति गोवद्र्धन सिंह सम्झनाले मनसुनलाई मध्यनगर गरी विपद् भएपछि तत्काल प्रारम्भिक द्रुत लेखाजोखा फाराम अनिवार्य रुपमा भर्नुपर्ने भएकोले स्थानीय तह र वडा कार्यालयमा दक्ष जनशक्ति र फाराम हुनु आवश्यक रहेकोमा जोड दिए ।

नेपालगञ्ज उपमहानगरपालिका वन, वातावरण तथा विपद् व्यवस्थापन समिति संयोजक सिंहको अध्यक्षतामा सम्पन्न उद्घाटन कार्यक्रममा निमित्त प्रमुख प्रशासकीय अधिकृत गोर्ख बहादुर थापा, नेपाल रेडक्रस सोसाइटी बाँके शाखा सभापति सम्झना, नेपाल रेडक्रस सोसाइटी विपद् तथा संकट व्यवस्थापन समिति संयोजक नरेन्द्र कुमार पौडेल र विपद् व्यवस्थापन विभाग केन्द्रीय कार्यालयका शेरबहादुर कार्की लगायतले विचार व्यक्त गरेका थिए । कार्यक्रम सञ्चालन नेपाल रेडक्रस सोसाइटी बाँकेका प्रहलाद विश्वकर्माले गरेका थिए ।

प्रकाशित मिति: शुक्रबार, असार १३, २०८२ २१:११