खजुरामा फलफूलका बिरुवा वितरण

स्थानीय

गृहपृष्ठ
स्थानीय
खजुरामा फलफूलका बिरुवा वितरण

खजुरामा फलफूलका बिरुवा वितरण

बिहीबार, असार १९, २०८२ बागेश्वरी पोस्ट

नेपालगन्ज । बाँकेको खजुरा गाउँपालिकाका विभिन्न बिद्यालयमा फलफूलका बिरुवा वितरण गरिएको छ । खजुरा गाउँपालिका वातावरण शाखामार्फत गाउँपालिकाभित्रका बिद्यालयहरुमा फलफूलका बिरुवा वितरण गरिएको हो ।

खजुरा गाउँपालिकालाई फलफूलको हबको रुपमा विकास गर्ने उद्देश्यले पालिकाले बर्षेनी फलफूलका बिरुवा वितरण गर्ने गरी काम शुरु गरेको गाउँपालिकाले जनाएको छ । आँप, लिची, अम्वा, कागती र अनारका बिरुवा गरी ६ हजार बिरुवा वितरण गरेको खजुरा गाउँपालिका वातावरण शाखा प्रमुख नेत्रलाल महतराले बताए ।

खजुराका श्री जनता नमुना मावि, आदर्श मावि र योगिनी माविमा बिरुवा वितरण भइसकेको र अन्य बिद्यालयहरुमा समेत वितरण गर्ने उनले बताए । यसैबिच आज जनता नमुना मावि खजुरामा जलवायु न्याय क्लबका बालिकाहरुलाई विरुवा बितरण गरिएको छ । आँप ७३, लिची १८, अम्वा ४०, कागती ५० र अनार १८ गरी १९९ फलफुलका बिरुवा वितरण गरिएको हो ।

रुम टु रिडको सहयोगमा बास नेपालद्वारा सञ्चालित बालिका शिक्षा कार्यक्रम अन्तरगत रहेको जलवायु न्याय क्लबमा आबद्ध ५२ जना वालिकाहरुलाई ५२ वटा फलफूलका बिरुवा बितरण गरिएको छ भने बाँकी बिरुवाहरु बिद्यालयमा रोपिएको श्री जनता नमुना माविका प्रधानाध्यापक महेन्द्र खत्रीले बताए ।

बालिकाहरुलाई बिरुवा वितरण बिद्यालय ब्यवस्थापन समिति अध्यक्ष केर सिंह थापा, प्रधानाध्यापक खत्री, बास नेपालका हेमराज भट्ट र जमुना चौधरीले गरेका थिए । विरुवा पाएपछि घरमा गएर रोप्ने र उचित संरक्षण गर्ने बालिकाहरुले बताए । विगतका बर्षहरुमा पनि बालिका शिक्षा कार्यक्रम सञ्चालित कोहलपुर नगरपालिका, बैजनाथ गाउँपालिका र खजुरा गाउँपालिकाका १२ ओटा बिद्यालयमा जलवायु न्याय क्लबका बालिकाहरुले बृक्षारोपण गर्दै आएका छन् । बिरुवाको महत्व बुझी जलवायु न्याय क्लबका बालिकाहरुले आफ्नो घर, छिमेक र बिद्यालयमा बृक्षारोपण गरी वातावरण संरक्षणमा लागेकोमा खुसी लागेको बिद्यालयले जनाएको छ ।

प्रकाशित मिति: बिहीबार, असार १९, २०८२ १९:४६

प्रतिक्रिया दिनुहोस्