बैजनाथमा कृषि आधुनिकीकरणमा ६ करोड लगानी, ११ किसानलाई ई–लोडिङ रिक्सा वितरण

स्थानीय

गृहपृष्ठ
स्थानीय
बैजनाथमा कृषि आधुनिकीकरणमा ६ करोड लगानी, ११ किसानलाई ई–लोडिङ रिक्सा वितरण

बैजनाथमा कृषि आधुनिकीकरणमा ६ करोड लगानी, ११ किसानलाई ई–लोडिङ रिक्सा वितरण

बुधबार, असार ३२, २०८२ बागेश्वरी पोस्ट

बैजनाथ (बाँके) । कृषि र पशुपालन क्षेत्रलाई प्रविधिमैत्री बनाउने उद्देश्यले बैजनाथ गाउँपालिकाले आर्थिक वर्ष २०८२/८३ का लागि ६ करोड रुपैयाँको बजेट विनियोजन गरेको छ । “किसानसँग पालिका प्रमुख” कार्यक्रम अन्तर्गत सञ्चालित योजनामा प्रारम्भिक चरणमा ११ जना किसानले ई–लोडिङ रिक्सा प्राप्त गरेका छन् ।

गाउँपालिका अध्यक्ष प्रकाश बहादुर शाहीका अनुसार कार्यक्रमका लागि ५३ जना किसानले निवेदन दिएका थिए । ती मध्ये छनोट प्रक्रियाको आधारमा ११ जना योग्य किसानलाई अनुदानमा रिक्सा वितरण गरिएको हो । यस कार्यक्रममार्फत कृषकहरूलाई ७० प्रतिशत अनुदानमा ई–लोडिङ रिक्सा प्रदान गरिएको छ, जसले उत्पादन ढुवानीमा सहजता ल्याउनुका साथै लागतमा कमी ल्याउने अपेक्षा गरिएको छ ।

गाउँपालिकाले कृषि क्षेत्रमा यान्त्रीकरण, प्रविधिको प्रयोग र नवप्रवर्तनलाई प्राथमिकता दिँदै आएको छ । अध्यक्ष शाहीले भने, “कृषिमा यान्त्रीकरणले किसानको श्रम कम गर्ने मात्र होइन, उत्पादन लागत घटाएर प्रतिस्पर्धी बनाउँछ । हामी अझ धेरै किसानलाई समेट्ने योजनामा छौं ।”

कृषि शाखा प्रमुख प्रमोद कुमार विश्वकर्माले स्थानीय सरकारले जनताको आवश्यकता र आवाजमा आधारित भएर काम गरिरहेको उल्लेख गर्दै भने, “बैजनाथ सरकार हेर्दा देखिने, छाम्दा भेटिने, बोल्दा सुन्ने सरकार हो । किसानको दैलोमा पुगेर सेवा पुर्‍याउने हाम्रो प्रतिबद्धता हो ।”

गाउँपालिकाले आगामी दिनहरूमा थप प्रविधियुक्त उपकरण, पशु सेवा विस्तार, सिंचाई प्रणाली सुधार र व्यवसायिक कृषि प्रवर्द्धनका लागि कार्यक्रमहरू अघि ल्याउने तयारी गरिरहेको बताइएको छ ।

प्रकाशित मिति: बुधबार, असार ३२, २०८२ २१:२३

प्रतिक्रिया दिनुहोस्