क्यान्सर पीडितको सहयोगार्थ तथा नीलसागर सेवा आश्रमको भवन निर्माणार्थ 'चियापान अभियान'

स्थानीय

गृहपृष्ठ
स्थानीय
क्यान्सर पीडितको सहयोगार्थ तथा नीलसागर सेवा आश्रमको भवन निर्माणार्थ 'चियापान अभियान'

क्यान्सर पीडितको सहयोगार्थ तथा नीलसागर सेवा आश्रमको भवन निर्माणार्थ 'चियापान अभियान'

सोमबार, साउन ५, २०८२ बागेश्वरी पोस्ट

नेपालगञ्ज । बाल क्लबका पूर्व सदस्यहरुद्वारा सञ्चालित सहयात्री नेपाल बाँके र विन्दु कुँवर फाउण्डेशन तथा क्यान्सर पीडित सहयागी अभियन्ताहरुले नेपालगञ्जमा चियापान अभियान सञ्चालन गर्न लागेका छन् । 'एक चिया, एक जीवन, एक परिवर्तन' भन्ने नाराका साथ क्यान्सरबाट ज्यान गुमाएकी महिला विकास निरीक्षक विन्दु कुँवरको स्मरणमा क्यान्सर पीडित तथा नीलसागर सेवा आश्रमको भवन निर्माणार्थ चियापान अभियान सञ्चालन गर्न लागेको सहयात्री नेपाल बाँकेकी सदस्य श्वेता गुरुङले बताइन् । साउन ९ गते शुक्रबार नेपालगञ्जको त्रिभुवन चोकमा दिउँसो ३ बजेदेखि बेलुकी ७ बजेसम्म स्टल राखेर चियापान गराइनेछ । चियाको स्टल राखेर निःशुल्क चिया खुवाइनेछ भने चिया खान आउने मनकारीहरुले स्वेच्छाले सहयोग गर्न सक्नेछन् ।

चिया अभियानबाट सहयोग भएको रकमको ८० प्रतिशत निलसागर सेवा आश्रमको भवन निर्माणमा सहयोग गर्ने सहयात्री नेपालका कोषाध्यक्ष सल्मान सल्मानीले बताए । निलसागरको भवन बनेपछि एउटा कोठालाई विन्दु कुँवर स्मृति नामाकरण गरिनेछ । सहयोगको २० प्रतिशत रकम क्यान्सर पीडितलाई सहयोग गर्ने सहयात्री नेपालकी गुरुङले जानकारी दिइन् ।पत्रकार सम्मेलनमा सहभागी नेपाल पत्रकार महासंघ बाँकेका अध्यक्ष नवीन गिरीले अभियान नयाँ र राम्रो भएको बताए । अभियानलाई सबैले सहयोग गर्नुपर्ने गिरीले बताए । विन्दु कुँवरकी छोरी सम्विधा थापाको उपस्थिति रहेको कार्यक्रममा कुँवरको योगदानको चर्चा गरिएको थियो । सम्बिधाले आमाको प्रेरणाले आफू सामाजिक अभियानमा सक्रिय हुँदै गएको बताइन् । क्यान्सर पीडित विन्दुको सन् २०२० मा निधन भएको थियो । कार्यक्रम सञ्चालन देवा बहादुर खत्रीले गरेका थिए ।

प्रकाशित मिति: सोमबार, साउन ५, २०८२ २१:१७

प्रतिक्रिया दिनुहोस्