आपतकालीन अवस्थामा यौन तथा लैङ्गिक हिंसा र बाल संरक्षण सचेतना तालिम सुरु

स्थानीय

गृहपृष्ठ
स्थानीय
आपतकालीन अवस्थामा यौन तथा लैङ्गिक हिंसा र बाल संरक्षण सचेतना तालिम सुरु

आपतकालीन अवस्थामा यौन तथा लैङ्गिक हिंसा र बाल संरक्षण सचेतना तालिम सुरु

शुक्रबार, साउन ९, २०८२ बागेश्वरी पोस्ट

नेपालगञ्ज । नेपाल रेडक्रस सोसाइटी (नेरेसो) बाँके जिल्ला शाखाको आयोजनामा २ दिने आपतकालीन अवस्थामा यौन तथा लैङ्गिक हिंसा र बाल संरक्षण सचेतना तालिम नेपालगञ्जमा सुरु भएको छ । तालिमको शुभारम्भमा नेरेसो बाँके शाखाका सभापति गोबद्र्धन सिंह सम्झनाले बिपद र संघर्ष जस्ता आपतकालीन परिस्थितिमा आमनागरिक मृत्यु र घाइते हुनुपरेको र त्यस्तोमा महिला, बालबालिका, जेष्ठ नागरिक र अपाङ्गता भएकाहरु पनि धेरै मात्रामा परेको बताउँदै त्यस्ता व्यक्तिलाई रेडक्रसले मानवीय सहयोग गरिरहेको उल्लेख गरे । तालिममा रेडक्रस अभियान, यौन तथा लैङ्गिक हिंसा, बाल संरक्षण, कानुनी प्रावधान, मूलप्रवाहीकरण र सहयोग संरचनाबारे सहभागीलाई जानकारी र प्रशिक्षित गरिनेछ ।

तालिममा विपद प्रभावित डुडुवा, नरैनापुर, राप्तीसोनारी गाउँपालिकाका स्थानीय समुदाय, जनप्रतिनिधि, र नेरेसो उपशाखा गरी २५ जनाको सहभागिता रहेको छ भने तालिमको सहजीकरण नेरेसो केन्द्रीय कार्यालयका निर्देशक दिव्यराज पौडेल, बरिष्ठ संगठन विकास अधिकृत निरञ्जना मल्ल र कार्यक्रम कोर्डिनेटर सुवेक्षा मानन्धरले गरिरहेका छन् ।
नेरेसो बाँके शाखाका सभापति सम्झनाको अध्यक्षतामा सम्पन्न शुभारम्भ कार्यक्रममा शाखाका उपसभापति शान्ति श्रेष्ठ, मन्त्री अजिज अहमद सिद्धिकी, कोषाध्यक्ष राकेश बहादुर श्रीवास्तव, उपमन्त्री तेज बहादुर सुवेदी, सदस्य नरेन्द्र कुमार पौडेल, मीन बहादुर मल्ल, उपनिर्देशक दोलख बहादुर डाँगी लगायतको उपस्थिति रहेको थियो भने कार्यक्रम सञ्चालन नेरेसो बाँकेका लेखा अधिकृत झविलाल शर्माले गरेका थिए । रेडक्रस तथा रेडक्रिसेन्ट सोसाइटीहरुको अन्तर्राष्ट्रिय महासंघ (फेडेरेशन) को सहयोगमा जिल्लामा सञ्चालित नेपालमा बाढी पूर्वानुमानमा आधारित पूर्व कार्यहरु 'सिप' परियोजनाको व्यवस्थापनमा प्रशिक्षण सञ्चालन भएको हो ।

प्रकाशित मिति: शुक्रबार, साउन ९, २०८२ २२:२४

प्रतिक्रिया दिनुहोस्