फरार ५ हजार बढी कैदीबन्दी पक्राउ गर्न विशेष अपरेसन

सुरक्षा-अपराध

गृहपृष्ठ
सुरक्षा-अपराध
फरार ५ हजार बढी कैदीबन्दी पक्राउ गर्न विशेष अपरेसन

फरार ५ हजार बढी कैदीबन्दी पक्राउ गर्न विशेष अपरेसन

बिहीबार, कात्तिक २७, २०८२ बागेश्वरी पोस्ट

फाइल फोटो

काठमाडौँ । जेनजी आन्दोलनका क्रममा कारागारबाट भागेका मध्ये अझै पनि पाँच हजार भन्दा बढी कैदीबन्दी फरार रहेको गृह मन्त्रालयले जनाएको छ । बिहीबार सिंहदरबारमा बसेको राष्ट्रिय सभा अन्तर्गतको सङ्घीयता सबलीकरण तथा राष्ट्रिय सरोकार समितिको बैठकमा बोल्दै गृहमन्त्री ओमप्रकाश अर्यालले उक्त तथ्यांक सार्वजनिक गरेका हुन् ।

उनका अनुसार आन्दोलनका क्रममा देशभरका विभिन्न जेलहरूबाट १४ हजार ५५४ जना कैदीबन्दी फरार भएका थिए । तीमध्ये हालसम्म ९ हजार ४४१ जनालाई पुनः नियन्त्रणमा लिइएको छ भने बाँकी ५ हजार १३ जना अझै खोजीमा छन् ।

गृहमन्त्री अर्यालले नेपाल प्रहरीले फरार कैदीहरूलाई समात्न देशव्यापी विशेष अभियान सञ्चालन गरिरहेको जानकारी दिए । उनले फरार व्यक्तिहरूको सूची सार्वजनिक गरी, उनीहरू कुनै पनि सरकारी सेवा लिन आएमा सेवा नदिन सबै निकायलाई निर्देशन दिइएको समेत बताए ।

उनका अनुसार करिब दुई महिनापछि मन्त्रालयले फरार कैदीहरूको खोजीका लागि कार्यदल गठन गरेको हो । प्रत्येक जिल्लामा सहायक प्रमुख जिल्ला अधिकारीको संयोजकत्वमा कार्यदल गठन गरिएको छ र सुरक्षा तहमा विशेष अपरेसन पनि सञ्चालनमा रहेको उनले उल्लेख गरे ।

गृहमन्त्रीले फरार कैदी र लुटिएका हतियारलाई हालको प्रमुख सुरक्षा चुनौतीका रूपमा लिँदै सरकारले यी चुनौतीहरू पार गर्दै आगामी निर्वाचन स्वच्छ, निष्पक्ष र भयरहित वातावरणमा सम्पन्न गर्ने प्रतिबद्धता जनाए ।

त्यस्तै, उनले जेनजी आन्दोलनका क्रममा घाइते भएका व्यक्तिहरूलाई परिचयपत्रका आधारमा निःशुल्क उपचारको व्यवस्था गरिएको र विदेशमा रहेका नेपाली नागरिकलाई मतदानको अधिकार सुनिश्चित गर्न आवश्यक तयारी भइरहेको जानकारी पनि दिए ।

प्रकाशित मिति: बिहीबार, कात्तिक २७, २०८२ १७:२७

प्रतिक्रिया दिनुहोस्