अन्तरालमा संगीतसहित बीपीका कविता प्रस्तुत हुने

संस्कृति-साहित्य

गृहपृष्ठ
संस्कृति-साहित्य
अन्तरालमा संगीतसहित बीपीका कविता प्रस्तुत हुने

अन्तरालमा संगीतसहित बीपीका कविता प्रस्तुत हुने

सोमबार, पुस १४, २०८२ बागेश्वरी पोस्ट

नेपालगञ्ज । नेपालगञ्जमा पार्श्व संगीतसहित कविता प्रस्तुतिको कार्यक्रम आयोजना हुने भएको छ । अन्तरालले कवि बीपी अस्तुका एक दर्जन बढी कविताहरू पार्श्व संगीतसहित प्रस्तुत गर्ने कार्यक्रम आयोजना गर्न लागेको हो । उक्त कार्यक्रम पुस १९ गते शनिबार आयोजना हुनेछ । प्रभावकारी र एकाग्रतापूर्ण वातावरणमा कविता प्रस्तुतिले कार्यक्रमलाई स्मरणीय बनाउने गरी तयारी भइरहेको अन्तरालका प्रमुख कार्यकारी जयनारायण शाहले जानकारी दिए ।

नेपालगञ्ज सुर्खेत रोडस्थित वेष्टर्न मलमा रहेको अन्तराल हलमा हुने उक्त कार्यक्रममा सशुल्क सहभागिताको व्यवस्था गर्न लागिएको पनि शाहले जानकारी दिए । अन्तराल डेढ दशक बढी समयदेखि सन्चार, कला, साहित्य, गीतसंगीत, खेलकुद, इभेन्ट म्यानेजमेन्ट र पर्यावरणका क्षेत्रमा काम गर्दै आएको संस्था हो।

कवि अस्तु साहित्य र पत्रकारितामा सशक्त कलम चलाउँछन् । "मैले कविता लेख्न सिकेको शहरमै पहिलोपटक एकल कविता प्रस्तुति हुन लागेकोमा म उत्साहित छु," कवि बीपीले भने-"पार्श्व संगीतले कविता श्रवणलाई थप प्रभावकारी बनाउनेछ भन्ने विश्वास छ ।" पार्श्व संगीतका लागि गायक महेन्द्र सेढाई सहितका संगीतकर्मीहरुले साथ दिनेछन् । हाल कार्यक्रमका लागि रिहर्शल भइरहेको छ ।

अन्तराल शृङ्खलालाई अब हरेक महिना निरन्तरता दिने ढंगले तयारी भइरहेको आयोजकले जनाएको छ । "कविता र संगीतको बेजोड प्रस्तुति दर्शक तथा स्रोताहरुले मन पराउने हाम्रो विश्वास छ," अन्तरालका प्रमुख कार्यकारी शाह भन्छन्, "अन्तरालको यो मञ्चमा आगामी महिनाहरुमा कला, साहित्य, गीतसंगीत र खेलकुदका विशिष्ट व्यक्तित्वलाई प्रस्तुत गरिनेछ ।"

कार्यक्रम निर्धारित समयमा सुरु हुने र दर्शकहरु पलेटीमा बस्ने प्रवन्ध मिलाइएको आयोजकले जनाएको छ। कार्यक्रम अघिको आधा घण्टा भलाकुसारी र जलपानका लागि छुट्याइएको छ । कार्यक्रम शुरु हुनु १० मिनेट अघि हलको ढोका खुल्ने र एक घण्टा कविता प्रस्तुतिको कार्यक्रम रहनेछ । पाँच सय रुपैयाँको टिकट सुरुमा बुकिङ गर्नेहरूलाई ५० प्रतिशत छुटको व्यवस्था पनि मिलाइएको आयोजकले जनाएको छ । टिकट अन्तरालको कार्यालय र विभिन्न क्याफेहरुमा उपलब्ध छ ।

प्रकाशित मिति: सोमबार, पुस १४, २०८२ १८:५५

प्रतिक्रिया दिनुहोस्