एमाले उम्मेदवार राईको प्राथमिकता पूर्वाधार निर्माण

राजनीति

गृहपृष्ठ
राजनीति
एमाले उम्मेदवार राईको प्राथमिकता पूर्वाधार निर्माण

एमाले उम्मेदवार राईको प्राथमिकता पूर्वाधार निर्माण

सोमबार, माघ १९, २०८२ बागेश्वरी पोस्ट

नेपालगञ्ज । बाँके क्षेत्र नम्बर २ बाट नेकपा एमालेका प्रतिनिधि सभा सदस्य उम्मेदवार मोहम्मद इश्तियाक राईले पूर्वाधार विकास, कानुन निर्माण र सामाजिक सद्भावलाई आफूले प्राथमिकतामा राखेको बताएका छन् । सडक र पुलहरूको निर्माणले यहाँको भूगोललाई आपसमा नजिक्याउने र व्यापार व्यवसाय पनि चलायमान हुने भएकाले आफूले सुरुदेखि नै पूर्वाधार निर्माणलाई प्राथमिकतामा राखेर हिँडेको उम्मेदवार राईको भनाई छ।

आज वडा नम्बर ५ र ६ मा नेकपा एमालेको वडा कार्यालयमा आयोजित कार्यक्रमलाई सम्बोधन गर्दै पूर्व मन्त्री समेत रहेका राईले भेरी अस्पतालमा सेवा सुविधा विस्तार गर्न पनि आफूले पहल गरिरहेको बताए । २०७४ सालमा निर्वाचित भई केपी ओली नेतृत्वको सरकारमा सहरी विकास मन्त्री हुँदा आफूले बाँकेको विकासका लागि गरेका कामहरू स्मरण गर्दै उनले आफू फेरि निर्वाचित भएर मन्त्री बनेमा यो क्षेत्रको विकासका लागि अर्को अवसर हुन सक्ने दाबी गरे ।

सामाजिक सद्भावलाई बढावा दिन पनि आफ्नो जित जरूरी रहेको राईको भनाई थियो । ‘म ५ वर्ष सांसद रहँदा यहाँ कुनै पनि साम्प्रदायिक र जातजातिगत तनाव हुन दिएन । तर, २०७९ मा मेरो पराजयपछि कसरी धार्मिक सद्भावलाई धुजाधुजा पार्ने प्रयास गरियो भन्ने तपाइँहरूलाई थाहै छ’, राईले भने ।

मल फ्याक्ट्री खोलिदिन्छु भनेर यस अघि विजयी भएका उम्मेदवारले जनतालाई ठगेको पनि राईको भनाई थियो । उनले आफूले झुठो आश्वासन दिन नजानेको बताउँदै किसानहरूको मलको समस्या आफूले राम्रोसँग बुझेको र त्यसका लागि निर्वाचित भएपछि नीतिगत र कानुनी व्यवस्था गर्न आफू लागिपर्ने बताए ।

प्रकाशित मिति: सोमबार, माघ १९, २०८२ २१:३४

प्रतिक्रिया दिनुहोस्