eDrive Nepal को सेवा नेपालगञ्जमा शुभारम्भ

अर्थ

गृहपृष्ठ
अर्थ
eDrive Nepal को सेवा नेपालगञ्जमा शुभारम्भ

eDrive Nepal को सेवा नेपालगञ्जमा शुभारम्भ

शनिबार, माघ २४, २०८२ बागेश्वरी पोस्ट

नेपालगञ्ज । लुम्बिनी प्रदेशकै पहिलो अनलाइन ट्याक्सी तथा बाइक सेवा eDrive Nepal ले नेपालगञ्जबाट पनि औपचारिक रूपमा आफ्नो सेवा शुभारम्भ गरेको छ । शनिबार आयोजित उद्घाटन समारोहमा नेपालगञ्ज उपमहानगरपालिकाका नगर प्रमुख प्रशान्त बिष्टले रिबन काटेर सेवाको उद्घाटन गरेका हुन् । १८ महिना अघि बुटवल–भैरहवा क्षेत्रबाट सुरु गरिएको eDrive सेवा बाँके जिल्लाको प्रमुख सहर नेपालगञ्जमा पनि विस्तार गरिएको हो ।

हाल रुपन्देहीमा ११० वटा ट्याक्सी तथा ५०० भन्दा बढी मोटरसाइकल राइडरमार्फत सेवा दिइरहेको eDrive ले नेपालगञ्जमा प्रारम्भिक चरणमा १५ वटा इभी (विद्युतीय) ट्याक्सीमार्फत सेवा सुरु गरेको जनाएको छ । सेवा शुभारम्भ कार्यक्रममा बोल्दै eDrive Lumbini का निर्देशक विजय भण्डारी (बासु) ले समय अनुसार सेवा प्रणाली डिजिटल बन्दै गइरहेको सन्दर्भमा ट्याक्सी सेवालाई पनि प्रविधिसँग जोडेर अनलाइन माध्यमबाट सुरक्षित, सहज र सुलभ सेवा प्रदान गर्ने उद्देश्यले नेपालगञ्जमा सेवा सञ्चालनमा ल्याइएको बताए ।

त्यसैगरी कार्यक्रममा बोल्दै eDrive Lumbini का अध्यक्ष राज कुमार गुप्ताले युवालाई स्वदेशमै स्वरोजगार बनाउने र रोजगारी सिर्जना गर्ने लक्ष्यका साथ १८ महिना अघि रुपन्देहीबाट eDrive सेवा सुरु गरिएको जानकारी दिए । उनले आगामी दिनमा यो सेवा देशभर विस्तार गर्ने योजना रहेको पनि उल्लेख गरे ।

हाल eDrive Lumbini करीब ७ करोड रुपैयाँ भन्दा बढीको लगानीमा सञ्चालनमा रहेको छ ।

प्रकाशित मिति: शनिबार, माघ २४, २०८२ १९:४१

प्रतिक्रिया दिनुहोस्