१०० रुपैयाँ माथिका वस्तु आयातमा प्रतिबन्ध होइन, वैध व्यापार प्रवर्द्धनको नीति: धामी

अर्थ

गृहपृष्ठ
अर्थ
१०० रुपैयाँ माथिका वस्तु आयातमा प्रतिबन्ध होइन, वैध व्यापार प्रवर्द्धनको नीति: धामी

१०० रुपैयाँ माथिका वस्तु आयातमा प्रतिबन्ध होइन, वैध व्यापार प्रवर्द्धनको नीति: धामी

सोमबार, वैशाख ७, २०८३ बागेश्वरी पोस्ट

नेपालगञ्ज । १०० रुपैयाँ भन्दा माथिका वस्तु आयातमा भन्सार प्रक्रिया अनिवार्य गरिएको व्यवस्थाबारे बजारमा फैलिएका भ्रम र गलत सूचनाप्रति नेपालगञ्ज उद्योग वाणिज्य सङ्घका कोषाध्यक्ष मख्खन बहादुर धामीले गम्भीर ध्यानाकर्षण भएको जनाएका छन् । धामीले फेसबुक स्टाटसमार्फत उक्त व्यवस्था सामान आयातमा प्रतिबन्ध नभएको स्पष्ट पार्दै भनेका छन्, “यो नीति वैध व्यापार प्रवर्द्धन, पारदर्शिता सुनिश्चित गर्ने तथा राज्यको राजस्व प्रणालीलाई सुदृढ बनाउने उद्देश्यले ल्याइएको हो ।”

उनले १०० रुपैयाँ भन्दा माथिका वस्तुहरू भन्सार प्रक्रिया पूरा गरी सहज रूपमा आयात गर्न सकिने बताउँदै सरोकारवालाहरूलाई भ्रममा नपरी कानुनी प्रक्रिया अनुरूप व्यापार सञ्चालन गर्न आग्रह गरेका छन् । यस्तै, स्वदेशी उत्पादनको प्रयोग, संरक्षण र प्रवर्द्धनमार्फत आत्मनिर्भर अर्थतन्त्र निर्माणतर्फ अग्रसर हुनुपर्ने आवश्यकता औंल्याउँदै धामीले नेपाल सरकार समक्ष कर प्रणालीलाई अझ सरल, न्यायोचित र व्यवहारिक बनाउन सुझाव समेत दिएका छन्, जसले व्यापारी र उपभोक्ता दुवैलाई सहजता प्रदान गर्ने विश्वास उनको छ । “करमाथि करको बोझले होइन, सन्तुलित नीतिले मात्र दिगो अर्थतन्त्र निर्माण सम्भव हुन्छ,” धामीले भनेका छन् ।

सङ्घको तर्फबाट उनले कालोबजारी, तस्करी तथा अवैध व्यापारमा संलग्न जोसुकैलाई कानुनको दायरामा ल्याई कडा भन्दा कडा कारबाही गर्नुपर्ने धारणा पनि व्यक्त गरेका छन् । वैध व्यापारलाई प्रोत्साहन र अवैध गतिविधिलाई नियन्त्रण नगरेसम्म राज्यको अर्थतन्त्र सुदृढ हुन नसक्ने सङ्घको निष्कर्ष रहेको उनको भनाई छ । नेपालगञ्ज उद्योग वाणिज्य सङ्घ भविष्यमा पनि सत्य, पारदर्शिता, कानुनी शासन र जिम्मेवार व्यापारिक अभ्यासको पक्षमा दृढ रहने उनको प्रतिबद्धता छ ।

प्रकाशित मिति: सोमबार, वैशाख ७, २०८३ १३:४७

प्रतिक्रिया दिनुहोस्