सुर्खेतमा कोरोना संक्रमितलाई प्रहरीद्वारा निर्घात कुटपिट

समाचार

गृहपृष्ठ
समाचार
सुर्खेतमा कोरोना संक्रमितलाई प्रहरीद्वारा निर्घात कुटपिट

सुर्खेतमा कोरोना संक्रमितलाई प्रहरीद्वारा निर्घात कुटपिट

बिहीबार, साउन १, २०७७ बागेश्वरी पोस्ट

सुर्खेत ।दुई महिनाअघि रूकुममा प्रहरीले महिलामाथि कुटपिट गरेको घटना सेलाउन नपाउँदै सुर्खेतमा पनि एक प्रहरीले कोरोना संक्रमितलाई मरणासन्न हुनेगरी कुटेको भेटिएको छ।

सुर्खेको सिम्ता गाउँपालिकामा प्रहरी सहायक निरीक्षक विजय पुनले एक जना कोरोना संक्रमित व्यक्तिलाई सोमबार कुटपिट गरेको पाइएको हो। सिम्ता गाउँपालिका–६ को बागेश्वरी माध्यमिक विद्यालयकको क्वारेन्टिनमा बसेका सिम्ता गाउँपालिका–८ का एक युवकमाथि प्रहरी सहायक निरीक्षक पुनले असार २९ गते (सोमबार) कुटपिट गरेका हुन्।

ती युवक भारतबाट आएर दुई साता अघिदेखि क्वारेन्टिनमा बसेका थिए। आफूसँगै बसेका साथीहरूसँग घर जान खोजेपछि भाग्न खोजेको बहानामा ती असईले उनीमाथि कुटपिट गरेको पीडितका आफन्तले बताए।

पीडितका भाइका अनुसार उनका कुटपिटका क्रममा उनको बायाँ हात भाँचिएको छ। ‘क्वारेन्टिनबाट अलिकति बाहिर जानुभएको रहेछ, प्रहरीले कुटिहालेछन्,’ उनले भने, ‘प्रहरीले एक जनालाई नियन्त्रणमा लिन पिट्नै पर्ने त थिएन होला, त्यतिकै पनि सम्झाएर भित्र लिन सकिन्थ्यो।’ बिहीबार यसै विषयमा प्रहरी स्थानीय सरकार लगायतसँग छलफल थालिएको उनले बताए।

उपचारको सम्पूर्ण व्यवस्था गर्नुपर्ने उनको माग छ। पीडितका भाइका अनुसार सिम्तामा भएको कुटपिटबाट घाइतेको शरीरभर निलडाम छ। कुटपिट भएकै दिन उपचारका लागि अस्पताल लैजान आफन्तले माग गरे पनि स्थानीय तहले बेवास्ता गरेको छ।

कोरोना पोजेटिभ देखिएका कारण स्थानीय तहले अस्पताल लैजान नदिएको पनि उनको भनाइ छ। ‘उही दिन उपचार गर्न लैजाऊँ भन्दा स्वाब परीक्षण गरिएको रिपोर्टमा गडबडी भएका कारण लान दिइएन,’ उनले भने, ‘आज फेरि चेक हुँदैछ, रिपोर्ट यदि नेगेटिभ आयो भने हामीले नछुनेगरी गाडीमा राखेर नेपालगञ्ज लैजाने कुरा छ।’

यस्तै, सुर्खेतको सिम्तामा भएको कुटपिटको घटनामा संलग्न प्रहरी सहायक निरीक्षक विजय पुनलाई जिल्ला प्रहरी कार्यालय तानिएको छ। उनलाई कारबाहीस्वरूप जिल्ला प्रहरी कार्यालयमा तानिएको डिआइजी वसन्तकुमार पन्तले बताए। यो घटनाका बारेमा पनि अनुसन्धान भइरहेको उनले जानकारी दिए। अनुसन्धानपछि आवश्यक कारबाही गरिने उनले बताए। सेतोपाटीबाट।

प्रकाशित मिति: बिहीबार, साउन १, २०७७ १४:३८

प्रतिक्रिया दिनुहोस्