संविधानलाई लिकमा ल्याउने काम सर्वोच्च अदालतको हो: कृष्ण पहाडी

समाचार

गृहपृष्ठ
समाचार
संविधानलाई लिकमा ल्याउने काम सर्वोच्च अदालतको हो: कृष्ण पहाडी

संविधानलाई लिकमा ल्याउने काम सर्वोच्च अदालतको हो: कृष्ण पहाडी

बिहीबार, माघ ८, २०७७ बागेश्वरी पोस्ट

नेपालगन्ज । मानव अधिकार तथा शान्ति समाजका संस्थापक अध्यक्ष कृष्ण पहाडीले संविधानलाई लिकमा ल्याउने काम सर्वोच्च अदालतको भएको बताउनुभएको छ । अदालतलाई तत्कालीन माओवादीको जनअदालत जस्तो नबनाउन उहाँले चेतावनी समेत दिनुभयो । समाजको बाँके शाखाले आज नेपालगन्जमा गरेको असंवैधानिक र अलोकतान्त्रिक तवरमा प्रतिनिधिसभा विघटन: प्रतिगमनको सिलसिला विषयक नागरिक सभामा बोल्दै पहाडीले सनक र लहडका भरमा विघटन गरिएको संसद् पुनःस्थापनाको विकल्प नरहेको बताउनुभयो । वहुरुपी चरित्रका प्रधानमन्त्री केपी ओलीको स्वेच्छाचारी प्रवृत्तिले मुलुक पश्चगमनको दिशामा अग्रसर रहेको टिप्पणी गर्नुभयो । प्रधानमन्त्री असंवैधानिक ओलीले फायर खोलेर लोकतन्त्रलाई घाइते बनाएको बताउनुभयो । असंवैधानिक, अलोकतान्त्रिक र अराजनीतिक कार्यका विरुद्ध नागरिक खबरदारी जरुरी रहेको पहाडीको भनाई छ । उहाँले यो हर्कतले संविधान नै नरहने हो कि भन्ने चिन्ता बढेको बताउनुभयो । नागरिक सभामा बोल्दै समाजका सभापति उत्तम पुडासैनीले बाहिर चर्चा गरिएझैं संसद् विघटनको असंवैधानिक कार्यमा सबै घटनाक्रमले सेटिङ नै छ कि भन्ने संशय बढाएको बताउनुभयो । वरिष्ठ उपसभापति गोविन्द खनालले ट्र्याक आउट भएको संविधानलाई ट्र्याकमा ल्याउन दबाब सिर्जना गर्नुपर्नेमा जोड दिनुभयो । महासचिव सुशील बस्नेतले संसद् पुन:स्थापना भए मात्र संविधान जोगिने बताउनुभयो । नागरिक सभामा कवि अर्जुन पराजुलीले चोटिला कविता मार्फत् असंवैधानिक कदमको विरोध गर्नुभएको थियो । समाजका बाँके शाखा सभापति प्रभाकर भट्टराईको सभापतित्वमा भएको सभामा अधिवक्ता प्रह्लाद बहादुर कार्की, विश्वजीत तिवारी, नेपालगन्ज उद्योग बाणिज्य संघका निवर्तमान अध्यक्ष नन्दलाल वैश्य, गैरसरकारी संस्था महासंघ बाँकेका अध्यक्ष नमस्कार शाह, पत्रकार नवीन गिरी लगायतले संविधानलाई मिचेर गरिएको संसद् विघटन असंवैधानिक भएको बताउनुभयो । सचिव देबेन्द्रनाथ शुक्लाले सहजीकरण गर्नुभएको नागरिक सभामा उपाध्यक्ष प्रेमप्रसाद शर्माले स्वागत मन्तब्य ब्यक्त गर्नुभएको थियो ।