मोहना- राजघाट पुल बन्न नसक्दा स्थानियहरु सास्ती खेप्दै

समाचार

गृहपृष्ठ
समाचार
मोहना- राजघाट पुल बन्न नसक्दा स्थानियहरु सास्ती खेप्दै

मोहना- राजघाट पुल बन्न नसक्दा स्थानियहरु सास्ती खेप्दै

शुक्रबार, मंसिर ६, २०७६ बागेश्वरी पोस्ट

धनगढी । मोहना–राजघाट पुल अहिले सम्म नबन्दा स्थानियहरुले सास्ती खेप्दै आइरहेका छन् । निर्माण सुरु भएको छ वर्षसम्म पनि उक्त पुल बन्न सकेको छैन् ।ठेक्का लिएको कम्पनीले ढिला सुस्ती र लापरबाहीले गर्दा तीन बर्षमा निर्माण भइसक्नु पर्ने पुल अहिले सम्म बन्न सकेको छैन् ।

स्थानीयको गुनासो धेरै बढे पछि उक्त निर्माण कम्पनीलाई जरिवाना लिएर काम गराउने तयारी थालिएको सडक डिभिजन कार्यालय महेन्द्रनगरका सूचना अधिकारी लक्ष्मण जोशीले बताए । जोशीका अनुसार एक पटक म्याद थप भइसकेकाले अब उक्त कम्पनीको म्याद थप नहुने भएको छ । ‘निर्माण कम्पनीले लापरवाही गरेकाले अब जरिवाना तिरेर उसले जसरी पनि काम सम्पन्न गर्नुपर्ने जोशीले बताए। मोहना नदीमा निर्माण भइरहेको पुलको छ वर्षसम्म एउटा मात्रै स्पाइन तयार भएको छ । अझै दुई वटा स्पाइन बनाउन बाँकी रहेको छ । पुल निर्माणका लागि थप गरिएको म्याद गत असार मसान्तमा सकिएपछि निर्माण कम्पनीले भने पुनः म्याद थप गराउने प्रक्रियालाई अगाडि बढाएको छ । कम्पनीले त्यसको लागि सडक डिभिजन कार्यालयमा फाइलसमेत पेस गरेको छ । तर, म्याद थप गर्नु पर्ने कुनै आधार नरहेको सूचना अधिकारी जोशीले बताए । ‘अब ठेकेदारले जरिवाना तिरेर काम गर्नुको विकल्प छैन’, उनले भने–‘म्याद थप हुँदैन । बरु, काम भएन भने कारबाहीको प्रक्रिया अगाडि बढाउँछौ ।’

धनगढी उपमहानगरपालिकाको चटकपुर र कञ्चनपुरको कृष्णपुर नगरपालिकालाई जोड्ने गरी मोहना नदीमा निर्माण भइरहेको सो पुलको लम्बाइ १२० मिटर रहेको छ । पुल निर्माणका लागि आर्थिक वर्ष २०७०/०७१ मा ठेक्का भएको थियो । पुलको कुल लागत सात करोड ४५ लाख रुपियाँ रहेको छ ।

चन्द्रशेखर मल्लको निर्माण कम्पनी एलाइट एडभेञ्चर जेभीले ठेक्का पाइ २०७१ बाट काम सुरु गरेको थियो । तर, तत्कालीन समयमा यहाँ भएको आन्दोलन, नाकाबन्दी लगायतका कारणले तदारुकताको साथ काम गर्न नसकेको निर्माण कम्पनीले पनि स्वीकार गर्दै आएको छ ।

स्थानीयलाई समस्या
मोहना नदीमा पुल नबन्दा स्थानीयले समस्या भोग्दै आएका छन् । पुल नभएका कारणले उनीहरु चर्को शुल्क तिरेर डुङ्गामार्फत नदी वारपार गर्ने गरेका छन् । हिउँदमा भने काठे पुल तरेर ओहोर दोहोर गर्नु पर्ने बाध्यता रहेको छ । ‘डुङ्गा होस वा काठे पुल जे मार्फत नदी तर्दा पनि हामीले चर्को शुल्क तिर्नु पर्छ’, कृष्णपुर नगरपालिका ९ पिपरियाका स्थानीय बहादुर रानाले भने–‘पुल नबन्दा धेरै समस्या भएको छ।’ उनी तरकारी बिक्रीका लागि दैनिक धनगढीसम्म आउने गर्दछन् । समयमा पुल नबनेपछि आफूहरुले धेरै समस्या भोग्दै आएका छन् । बर्षामा डुङ्गामार्फत नदी तर्दा स्थानीयले सय रुपैयाँसम्म शुल्क तिर्ने गरेका छन् ।

यसैगरी, काठे पुलमा मान्छेकोमात्रै पाँच, साइकलको १० र मोटरसाइकलको २० रुपैयाँ लिने गरिएको छ । निर्माणाधीन मोहना राजघाट पुलको नजिकै काठे पुल बनाइएको छ । पुल तरे वाफत राजघाटबाहेक बाँकी सबै गाउँका स्थानीयले शुल्क तिर्नु पर्दछ ।

प्रकाशित मिति: शुक्रबार, मंसिर ६, २०७६ ०९:५६

प्रतिक्रिया दिनुहोस्